ISABELA CITY, BASILAN – Pormal nang nanumpa si Governor-elect Mujiv Hataman bilang bagong gobernador ng Basilan ngayong araw sa harap ng libu-libong Basileño sa punong-puno na Isabela City Gymnasium, kung saan iginiit niyang pamumunuan niya ang isang gobyernong para sa tao, hindi para sa iisang angkan.

“Gagawin kong gobyerno ng tao ang pagiging gobernador ng lalawigan ng Basilan,” ani Hataman matapos manumpa sa harap ni Executive Judge Leo Jay Torres Principe ng Regional Trial Court Branch 1 ng 9th Judicial Region.

“Titiyakin ko sa inyo na hindi po ako gobernador ng angkan ng Hataman kundi gobernador ako ng buong lalawigan at mamamayan ng Basilan,” dagdag niya.

Emosyonal na Panunumpa

Ang mass oath-taking na tinawag na “Pagjanji” ay ginanap sa Barangay Binuangan, pinangunahan ni Hataman at ng kanyang asawang si Mayor Sitti Djalia “Dadah” Turabin-Hataman, na muling nahalal bilang alkalde ng Isabela City.

Ibinahagi rin ni Hataman ang bigat ng katatapos lamang na halalan.

“Ito yung pinakamabigat at pinakamasakit na eleksyon na pinagdaanan ko. Dahil laman ko ang katunggali ko… pamangkin ko, anak ng Kuya ko ang naging katunggali,” aniya.

Tinanggap niya ang karanasang ito bilang isang malaking pagsubok sa kanilang pamilya, ngunit umaasa siya na ito ay magiging daan sa pagkakasundo.

“Kung nagmamahalan kami noon, titiyakin namin na mas higit kaming magmamahalan alang-alang sa inyo at sa ating lalawigan,” ani Hataman.

Muling Pagbabalik at Pangakong Mas Mahusay

Matagal nang pangarap ni Hataman ang pagiging gobernador ng Basilan ngunit ayon sa kanya, dalawampung taon ang lumipas bago ito matupad—at may mas malaking dahilan ang tadhana.

“Siguro hindi niyo mararanasan ang sementadong daan sa buong lalawigan kung di po ako naging regional governor,” aniya, tumutukoy sa panahon niya bilang pinuno ng Autonomous Region in Muslim Mindanao (ARMM).

Nangako si Hataman na hihigitan niya ang mga inaasahan, hindi lamang ng kanyang mga tagasuporta, kundi ng kanyang sariling pamilya.

“Ipapangako ko sa Kuya ko at sa buong pamilya ko: hihigitan ko ang kanilang pangako,” wika niya.

Kasamang Nanumpa

Kasama rin sa nanumpa sina: Vice Mayor-elect Nims Ajibon at walong bagong halal na konsehal ng Isabela City:
Karel Annjaiza Sakkalahul, Jashim Tiplani, Ameen Camlian, Alex Ututalum, Abner Rodriguez, Benjo Abubakar, at Jay Casas.

Mula sa Sangguniang Panlalawigan:
Amin Hataman, Ronie Hantian, at Faigdar Jaafar ng Basilan Unity Party (BUP).

Vice Mayor-elect JM Maturan ng Ungkaya Pukan Municipality.

Isang Gobernador para sa Lahat
Sa kanyang pagtatapos, pinaalalahanan ni Hataman ang mga dumalo:

“Ang Kapitolyo ay hindi po pag-aari ng isang gobernador. Titiyakin ko sa inyo: bukas ito sa lahat, anumang oras.”

Ang panunumpa ni Hataman ay simbolo ng kanyang pangako na pagsilbihan ang buong lalawigan nang may pagkakaisa, integridad, at bukas na pamumuno.