NAGBABALA si Pangulong Ferdinand R. Marcos Jr. laban sa pagiging kampante ng mga opisyal ng gobyerno, at muling iginiit na hindi na maaaring bumalik sa kulturang “business as usual” na matagal nang nagpapabigat sa burukrasya ng Pilipinas.

“Ayoko talaga ‘yung business as usual kasi ang dami natin problema. Naging problema ‘yan kasi business as usual tayo nang katagal-tagal. Ilang dekada tayong business as usual. Eh anong nangyari sa atin?” ani Marcos sa pinakabagong episode ng kanyang PBBM Podcast na inilabas nitong Lunes.

Mahigpit na Pagsubaybay sa Trabaho ng Gobyerno
Binanggit ng Pangulo na masusi niyang binabantayan ang performance ng kanyang mga Cabinet members at iba pang opisyal, at tiniyak na parehong malalaking proyekto at pang-araw-araw na operasyon ng gobyerno ay kailangang masunod sa tamang oras.

“We will be very, very conscientious of hitting our targets on time. … Hindi lang ‘yun, kundi ‘yung maliliit na bagay,” aniya.

Ilan sa mga binanggit na halimbawa ng Pangulo ay ang mga sirang escalator, hagdan, basura na hindi nakokolekta, at mahahabang pila sa mga pampublikong serbisyo.

“Every day ‘yun. Hindi mo pwede sabihin, ‘Oh, naayos ko na,’ tapos iiwanan mo. Kailangan balik-balikan mo.”

“Probation” Mentality at Mabilis na Pananagutan
Giit ni Marcos, ang accountability sa gobyerno ay dapat maging kasing higpit ng sa militar, kung saan ang pagkabigo ay agad na may kapalit.

“In the military, kapag sinasabi, ‘Eto yung gagawin mo.’ Pag hindi mo nagawa — Out. Relieved. Next.”

“Kahit kaibigan kita, mahal kita, pero kung hindi mo ginagawa ‘yung trabaho mo, hindi ito tungkol sa pagkakaibigan. Ito ay tungkol sa serbisyo publiko.”

Leadership by Inspection

Kinumpirma rin ng Pangulo na bahagi ng kanyang istilo ng pamumuno ang mga biglaang inspeksyon sa MRT-3, ospital, at iba pang pasilidad ng pamahalaan.

“Reports can only say so much… Iba-ibang accuracy rating kung minsan. It’s still important to go and see things for yourself.”

Tahimik na Pagpapalit ng mga Tauhan

Bagamat walang masyadong ingay, inamin ng Pangulo na may mga tauhang pinalitan o inilipat na sa iba’t ibang ahensya, bilang bahagi ng kanyang layuning gawing epektibo ang pamahalaan.

“If you’re not helping, get out of the way… Whatever get out of the way means — you’re fired, you’re floating, or you’ll be transferred.”

“Whatever it is, just get out of the way so I can do my job.”

Mensaheng Malinaw: Sa ilalim ni Pangulong Marcos Jr., hindi na sapat ang pagiging bahagi ng sistema — kailangan ng resulta. PNA