NANUMPA si Hugpong Ng Pagbabago (HNP) president at Davao Occidental Rep. Claude Bautista bilang miyembro ng Lakas-Christian Muslim Democrats (Lakas-CMD).

Pinangasiwaan ni Leyte Rep. Martin G. Romualdez ang panunumpa ni Bautista sa isang simpleng seremonya sa Makati City. Si Romualdez ang pangulo ng Lakas-CMD.

“It is indeed a great honor and pleasure to welcome Congressman Claude and Congresswoman Arenas. Thank you for joining Lakas-CMD,” sabi ni Romualdez.

Sinabi ni Romualdez na ang pagdami ng mga miyembro ng Lakas-CMD ay nangangahulugan ng paglakas ng suporta ng Kamara de Representantes na maisulong ang legislative agenda ni Pangulong Ferdinand “Bongbong” Marcos, Jr.

“Lakas-CMD is a solid ally of President Bongbong Marcos who received unprecedented mandate, trust and confidence from the people,” dagdag pa ni Romualdez.

Naging saksi naman sa panunumpa ni Bautista si Vice President at Education Secretary Sara Duterte, na siyang chairperson ng Lakas-CMD at HNP.

Sina Romualdez at Bautista ang mga campaign manager ni Duterte sa katatapos na halalan.

Samantala, nanumpa na rin bilang miyembro ng Lakas-CMD si Pangasinan Rep. Rachel Arenas.

Sa kasalukuyan ay mayroon ng 57 kongresista sa 19th Congress na miyembro ang Lakas-CMD.