PINAIGTING ng Philippine Health Insurance Corporation (PhilHealth) ang kampanya nito para sa maagap na pagtuklas ng breast cancer ngayong Oktubre, bilang pakikiisa sa Breast Cancer Awareness Month at bilang pagtugon sa direktiba ni Pangulong Ferdinand R. Marcos Jr. na palakasin ang akses sa serbisyong pangkalusugan sa buong bansa.

Sa isang pahayag nitong Biyernes, pinaalalahanan ni PhilHealth President at Chief Executive Officer Edwin Mercado ang mga kababaihan na samantalahin ang pinalawak na benepisyo at screening packages ng ahensya, na binigyang-diin na lubos na nagagamot ang breast cancer kung ito ay matutuklasan nang maaga.

“Sa pamamagitan ng PhilHealth YAKAP, ginagawa naming mas madali at mas abot-kaya ang serbisyong pangkalusugan. Hinihikayat ko ang bawat babae na huwag ipagpaliban ang inyong kalusugan,” ani Mercado.

“Magpa-check-up, mag-follow up, at sundin ang tamang gamutan. Ito ang inyong karapatan, at narito kami para suportahan kayo.”

Bagama’t isa sa mga uri ng kanser na madaling magamot, nananatili pa ring isa sa mga nangungunang sanhi ng pagkamatay ng kababaihang Pilipino ang breast cancer dahil sa huli nang pagkakatuklas nito.

Ayon sa isang 2023 pag-aaral ng Philippine Institute for Development Studies (PIDS), tanging 1 porsyento lamang ng kababaihang Pilipino ang sumasailalim sa cancer screening — humigit-kumulang 540,000 lamang sa tinatayang 54 milyong kababaihan. Tinatayang 65 porsyento ng mga kaso ng breast cancer ay natutuklasan na sa mga malulubhang yugto, na lubos na nagpapababa ng tsansa ng kaligtasan.

Upang mapagaan ang gastusin sa pagpapagamot ng cancer, pinalawak ng PhilHealth ang Z Benefit Package for Breast Cancer, kung saan tinaasan ang maximum coverage mula ₱100,000 tungo sa hanggang ₱1.4 milyon — katumbas ng 1,300 porsyentong pagtaas. Sakop na ngayon ng benepisyong ito ang mga pasyenteng nasa Stage 0 hanggang Stage 4, kabilang na ang mga kasalukuyang sumasailalim sa gamutan. Hanggang Setyembre, umabot na sa ₱72.03 milyon ang nailabas na pondo sa ilalim ng programang ito.

Bukod dito, sinusuportahan din ng PhilHealth YAKAP (Yaman ng Kalusugan Program) ang mga hakbang sa pag-iwas at maagang pagtuklas sa pamamagitan ng pagsagot sa mga outpatient breast cancer screening tests, kabilang ang:

Mammogram – ₱2,610

Breast Ultrasound – ₱1,350

Ayon sa PhilHealth, layunin ng programa nitong maalis ang gastusin bilang hadlang sa maagang pagsusuri at gamutan, at mahikayat ang mga kababaihan na agad magpatingin sa doktor.

Para sa mga katanungan tungkol sa PhilHealth YAKAP at Z Benefit Packages for Breast Cancer, maaaring makipag-ugnayan ang mga miyembro sa PhilHealth 24/7 hotlines:

📞 (02) 866-225-88
📱 0998-857-2957, 0968-865-4670 (Smart)
📱 0917-127-5987, 0917-110-9812 (Globe).