DIRECTANG mula sa database ng Anti-Money Laundering Council ang mga financial record na ginagamit ng prosekusyon upang ipakita ang P4.4 bilyong aggregate transactions na iniuugnay kina Vice President Sara Duterte at kanyang asawang si Atty. Manases Mans Carpio, sinabi ni AMLC Executive Director Atty. Ronel Buenaventura sa Senate impeachment court nitong Lunes.

“Iyong mga covered transactions report at suspicious transactions report ay inulat sa AMLC ng covered persons; they were extracted directly from our database,” sinabi ni Buenaventura sa Day 33 ng impeachment trial.

Iniharap ng prosekusyon sa pamamagitan ni private prosecutor Atty. Mae S. Divinagracia ang AMLC records sa ilalim ng Article II, na tumatalakay sa alegasyon ng unexplained wealth at asset disclosures ni Duterte.

Sa offer of testimony, sinabi ng prosekusyon na P4.4 bilyon sa aggregate transactions ang nanatili matapos itama ng isang bangko ang naunang reporting error.

Sinabi rin ng prosekusyon na hindi bababa sa P1.6 bilyon ang pumasok at P1.3 bilyon ang lumabas sa mga account na sakop ng presentation nito, habang may iba pang transactions na hindi matukoy sa summaries kung inflow o outflow.

Kabilang sa partikular na transaksyong itinampok ng prosekusyon ang umano’y P41 milyong cash withdrawal ni Carpio sa dalawang bangko sa iisang araw noong Agosto 6, 2024 — P23 milyon sa isang bangko at P18 milyon sa isa pa.

Ikinumpara ng prosekusyon ang withdrawal sa 2024 Statement of Assets, Liabilities and Net Worth ni Duterte, na ayon dito ay walang nakalistang cash on hand o cash in bank.

Ang paghahambing ay bahagi ng prosecution theory at hindi pa finding na may hindi naideklarang pera. Kailangang maipakita pa kung kanino ang pondo, saan ito nagmula at kung sakop ito ng disclosure requirements.

Tinukoy din ng prosekusyon ang dalawang check transactions noong 2011 at 2012 na umano’y nagbigay kay Duterte ng kabuuang P14,881,692.14.

Iniugnay ng prosecution offer ang mga tseke kay Samuel Uy, na inilalarawan sa mga alegasyon bilang may kaugnayan umano sa illegal drugs. Ang drug-lord characterization ay alegasyon at hindi AMLC finding.

Isa pang bahagi ng financial trail ang Cale88 Foods Corp., kumpanyang dating may malaking shareholding si Carpio.

Parehong nakalista sa AMLC exhibit set ang Covered Transaction Report at Suspicious Transaction Report tungkol sa Cale88.

Kasama rin sa prosecution presentation ang inward remittances sa Cale88 mula China at iba pang bansa.

Sa naunang corporate records na naiharap sa paglilitis, lumitaw na naging incorporator, director at shareholder si Carpio ng Cale88 mula 2021 hanggang 2024 at umabot sa 47.5 percent ang kanyang stake noong 2024.

Hindi, gayunman, dapat ituring na AMLC finding ang anumang partikular na halaga o alegasyong ang perang mula China ay ilegal hangga’t hindi ito naitatatag sa testimonya at underlying records.

Bukod sa personal records nina Duterte at Carpio, kabilang sa AMLC exhibit list ang GenCorp Industries Inc., Metro City Chow Foods Corp., Timesquare Bee Foods Corp., Great Jolly Times Foods Corp., Carpio Lawyers, 888 Bistro, Cale88 Foods Corp., Madayaw Fisheries Inc., Mati City Ice Plant and Cold Storage Inc., Geometry Security and Investigation Agency Inc., Davao New Royal Taipan Corp., Davao Emerging Taipans Corp., SGT Fortune Horse Corp., CYKT Inc. at City Hall King Chow Foods Corp.

Parehong may CTR at STR entries ang 888 Bistro at Cale88.

Pinayagan ni Presiding Officer Sen. Francis Chiz Escudero si Buenaventura na tumestigo matapos tutulan ng depensa ang AMLC testimony sa confidentiality grounds.

Sinabi naman ni Sen.-Judge Joel Villanueva na hindi absolute ang confidentiality at may exception dito sa impeachment.

Ang pagpayag kay Buenaventura na tumestigo ay hindi pa finding na ilegal ang mga transaksyon o napatunayan na ang unexplained wealth.

Ang covered transaction report at suspicious transaction report ay mga financial reports na isinusumite sa AMLC sa ilalim ng anti-money laundering rules. Ang kanilang existence lamang ay hindi katumbas ng finding ng money laundering.

Nasa prosekusyon pa rin ang pagpapatunay kung saan nagmula at napunta ang pera, sino ang beneficial owner nito at kung may materyal na discrepancy sa SALNs at iba pang financial disclosures ni Duterte.