MULING namayagpag ang tambala nina presidential candidate Ferdinand ‘Bongbong’ Marcos Jr. at vice presidential aspirant Sara Duterte sa survey ng Pulse Asia noong Enero.

Nakakuha si Marcos ng 60% malayo sa pumapangalawa na si Vice President Leni Robredo na mayroon lamang 16%.

Sumunod naman sina Sen. Manny Pacquiao at Manila Mayor Isko Moreno na kapwa may tig-8% at Sen. Panfilo Lacson na may 4%.

Ang nalalabing 4% ay pinaghatian ng iba pang kandidato kung saan 3% hindi pa alam kung sino ang kanilang iboboto.

Sa vice presidential race, nakakuha naman ni Duterte ng 50% malayo rin sa pumapangalawa na si Senate President Tito Sotto III na may 29%.

Sumunod naman sina Sen. Kiko Pangilinan na may 11%, Dr. Willie Ong na nakuha ng 5% at Buhay party-list Rep. Lito Atienza na may 1%.

Ang nalalabing bahagi ay pinaghatian ng iba pang kandidato at mga respondent nawalang ibinoto.

Ginawa ang survey mula Enero 19-24. Kinuha rito ang opinyon ng 2,400 respondent na edad 18 pataas. Mayroon itong error of margin na plus/minus 2% at 95% confidence level.