𝗛𝗜𝗡𝗗𝗜 𝗻𝗮𝗴𝘂𝘀𝘁𝘂𝗵𝗮𝗻 𝗻𝗶 𝗠𝗮𝗻𝗶𝗹𝗮 𝟯𝗿𝗱 𝗗𝗶𝘀𝘁. 𝗖𝗼𝗻𝗴. 𝗝𝗼𝗲𝗹 𝗥. 𝗖𝗵𝘂𝗮 𝗮𝗻𝗴 𝗶𝗻𝗮𝘀𝗮𝗹 𝗼 𝗶𝗻𝗮𝘀𝘁𝗮 𝗻𝗶 𝗩𝗶𝗰𝗲-𝗣𝗿𝗲𝘀𝗶𝗱𝗲𝗻𝘁 𝗜𝗻𝗱𝗮𝘆 𝗦𝗮𝗿𝗮 𝗗𝘂𝘁𝗲𝗿𝘁𝗲 𝘀𝗮 𝗯𝘂𝗱𝗴𝗲𝘁 𝗵𝗲𝗮𝗿𝗶𝗻𝗴 𝗻𝗴 𝗛𝗼𝘂𝘀𝗲 𝗖𝗼𝗺𝗺𝗶𝘁𝘁𝗲𝗲 𝗼𝗻 𝗔𝗽𝗽𝗿𝗼𝗽𝗿𝗶𝗮𝘁𝗶𝗼𝗻𝘀 𝘀𝗮𝗽𝗮𝗴𝗸𝗮𝘁 𝗻𝗮𝗴𝗶𝗻𝗴 𝗽𝗮𝗹𝗮𝗯𝗮𝗻 𝗮𝘁 𝗮𝗿𝗼𝗴𝗮𝗻𝘁𝗲 𝗮𝗻𝗴 𝗺𝗴𝗮 𝗽𝗮𝗴𝘀𝗮𝗴𝗼𝘁 𝗻𝗶𝘁𝗼 𝘀𝗮 𝗸𝗮𝘁𝗮𝗻𝘂𝗻𝗴𝗮𝗻 𝗻𝗴 𝗺𝗴𝗮 𝗸𝗼𝗻𝗴𝗿𝗲𝘀𝗶𝘀𝘁𝗮 𝗽𝗮𝘁𝘂𝗻𝗴𝗸𝗼𝗹 𝘀𝗮 𝗶𝗹𝗮𝗻𝗴 𝗺𝗮𝗵𝗮𝗵𝗮𝗹𝗮𝗴𝗮𝗻𝗴 𝗶𝘀𝘆𝘂 𝗻𝗮 𝗺𝗮𝘆 𝗸𝗶𝗻𝗮𝗹𝗮𝗺𝗮𝗻 𝘀𝗮 𝗵𝗶𝗻𝗶𝗵𝗶𝗻𝗴𝗶 𝗻𝗶𝗹𝗮𝗻𝗴 𝗯𝘂𝗱𝗴𝗲𝘁 𝗽𝗿𝗼𝗽𝗼𝘀𝗮𝗹 𝗽𝗮𝗿𝗮 𝘀𝗮 𝘀𝘂𝘀𝘂𝗻𝗼𝗱 𝗻𝗮 𝘁𝗮𝗼𝗻 (𝟮𝟬𝟮𝟱).

Dahil dito, binatikos ng kongresista ang tila palaban, paiwas at kawalang galang na pagtugon ng Pangalawang Pangulo sa mga ipinupukol na katanungan ng mga kasamahan nitong mambabatas kaugnay sa inilatag na proposed national budget ng Office of the Vice-President (OVP) para sa taong 2025.

Ayon kay Chua, umiiwas si VP Sara Duterte na sagutin ang mga katanungan ng mga kongresista at sa halip na sumagot ng maayos ay tila palaban pa ang kaniyang mga tugon kung saan halatang-halata aniya na ayaw nitong makipag-tulungan sa isinasagawang budget deliberation ng nasabing Komite para sa OVP.

Bunsod ng pangyayaring ito, tahasang sinabi ni Chua na mistulang harap-harapang ipinakita ni VP Sara ang kaniyang totoong “kulay” at para na rin din nitong ipinaramdam na walang maaaring kumanti sa kaniya kahit pa ang mga kongresista.

Pagdidiin pa ni Chua na ang naging asal at asta ni VP Sara sa budget deliberations ng Committee on Appropriations ay nagpapakita din ng kaniyang lantarang paglapastangan sa Konstitusyon at kawalan naman ng respeto sa Kamara de Representantes na may “oversight authority” sa lahat ng ahensiya ng pamahalaan.

“At the budget hearing for the Office of the Vice-President, VP Sara Duterte was combative, evasive, disrespectful and uncooperative. By het actions, decorum and demeanor. The Vice-President showed her true dark colors in her refusal to respect the constitutional power of Congress about the budget and oversight authority on the operations of all government agencies,” ayon kay Chua.

Hindi rin nagustuhan ng Manila solon ang tila “pagpi-feeling marunong” umano ni VP Sara Duterte na ang nais nitong mangyari ay siya pa ang magdidikta kung papaano dapat isagawa ang budget hearing ng House Committee on Appropriations.

“The VP tried to take over and dictate to the budget subcommittee how to conduct the hearing,” naiinis pang wika ni Chua sa naging asta ni VP Sara.

Maging si Manila 2nd Dist. Cong. Rolando “CRV” M. Valeriano ay hindi rin nagustuhan ang pabalang-balang na pagtugon ng Pangalawang Pangulo sa tanong ng mga kongresista matapos nitong ipahayag na hindi dapat ganoon ang naging pag-uugali ni VP Sara lalo na at siya ang pangalawang mataas na opisyal ng bansa.

Sabi ni Valeriano, parang nakalimutan umano ni VP Sara ang aral patungkol sa “good manner and right conduct” sapagkat kitang-kita ng buong mamamayan ang inasal nito na hindi magandang ehemplo para sa mga kabataan.