𝗦𝗔 𝗗𝗔𝗥𝗔𝗧𝗜𝗡𝗚 𝗻𝗮 𝗯𝘂𝗱𝗴𝗲𝘁 𝗱𝗲𝗹𝗶𝗯𝗲𝗿𝗮𝘁𝗶𝗼𝗻 𝗻𝗴 𝗞𝗮𝗺𝗮𝗿𝗮 𝗱𝗲 𝗥𝗲𝗽𝗿𝗲𝘀𝗲𝗻𝘁𝗮𝗻𝘁𝗲𝘀 𝗽𝗮𝗿𝗮 𝘀𝗮 𝟮𝟬𝟮𝟱 𝗻𝗮𝘁𝗶𝗼𝗻𝗮𝗹 𝗯𝘂𝗱𝗴𝗲𝘁 𝗻𝗴 𝗗𝗲𝗽𝗮𝗿𝘁𝗺𝗲𝗻𝘁 𝗼𝗳 𝗠𝗶𝗴𝗿𝗮𝗻𝘁 𝗪𝗼𝗿𝗸𝗲𝗿𝘀 (𝗗𝗠𝗪), b𝘂𝗯𝘂𝘀𝗶𝘀𝗶𝗶𝗻 𝗻𝗶 𝗢𝗙𝗪 𝗣𝗮𝗿𝘁𝘆 𝗟𝗶𝘀𝘁 𝗖𝗼𝗻𝗴. 𝗠𝗮𝗿𝗶𝘀𝘀𝗮 “𝗗𝗲𝗹 𝗠𝗮𝗿” 𝗣. 𝗠𝗮𝗴𝘀𝗶𝗻𝗼 𝘀𝗮 𝗻𝗮𝘁𝘂𝗿𝗮𝗻𝗴 𝗮𝗵𝗲𝗻𝘀𝗶𝘆𝗮 𝗮𝗻𝗴 𝗶𝗹𝗮𝗻𝗴 𝗺𝗮𝗵𝗮𝗵𝗮𝗹𝗮𝗴𝗮𝗻𝗴 𝗶𝘀𝘀𝘂𝗲𝘀 𝗽𝗮𝘁𝘂𝗻𝗴𝗸𝗼𝗹 𝘀𝗮 𝗸𝗮𝗹𝗮𝗴𝗮𝘆𝗮𝗻 𝗮𝘁 𝗸𝗮𝗽𝗮𝗸𝗮𝗻𝗮𝗻 𝗻𝗴 𝗺𝗴𝗮 𝗢𝘃𝗲𝗿𝘀𝗲𝗮𝘀 𝗙𝗶𝗹𝗶𝗽𝗶𝗻𝗼 𝗪𝗼𝗿𝗸𝗲𝗿𝘀 (𝗢𝗙𝗪𝘀).

Sa panayam ng People’s Taliba, ipinaliwanag ni Magsino na ang ibig nitong sabihin na “bubusisiin” ay ang gagawin niyang pagsusuri sa mga naging achievements ng DMW sa mga nakalipas na buwan upang tignan kung karapat-dapat sila para sa hinihingi nilang budget para sa susunod na taon.

Ayon kay Magsino, ang partikular na nais niyang tutukan sa nakatakdang pagharap ng DMW sa budget hearing ng Kongreso kasama na ang Overseas Workers Welfare Administration (OWWA) ay kung ano-ano na ang mga naging programa ng dalawang ahensiya ng pamahalaan para sa kapakanan ng mga OFWs kabilang na ang mga Pilipino Seafarers.

Winika ni Magsino na maaaring hilingin nito sa liderato ng Kamara ang pagkakaloob ng karagdagan at mataas na pondo para sa DMW at OWWA upang magamit para repatriation at emergency programs ng dalawang ahensiya para sa mga ililikas na OFWs pabalik ng bansa.

Sabi pa ng OFW Party List Lady solon, nais lamang nitong tiyakin na mayroong sapat na pondo ang DMW at OWWA upang agarang matulungan ang ating mga kababayan sa ibayong dagat na nasa bingit ng panganib o kaya naman ay kinakailangang makabalik agad ng Pilipinas.

Nabatid pa kay Magsino na tututukan din nito sa DMW ang nakakabahalang usapin patungkol naman sa kasalukuyang kalagayan ng mga OFWs na dumaranas ng mental health problem alinsunod sa kaniyang naging privilege speech sa Plenaryo ng Kamara de Representantes noong Lunes (August 5).

Ipinahayag pa ng kongresista na isusulong din nito ang pagkakaroon ng mas mataas na pondo para edukasyon at training programs para naman sa mga Pinoy seafarers o Pilipinong tripulante. Ang pagkakaroon aniya ng “world-class” training at education ang magpapalakas sa kanilang kakayahan at kompetisyon sa larangan ng global maritime.