MARIING kinokondena ng Department of Justice (DOJ) ang pamamaril at pagpatay kay G. Mauricio “Morrie” Pulhin, Chief of Technical Staff ng House Committee on Ways and Means.

Tinitiyak ng DOJ sa publiko na isasagawa ang masusing imbestigasyon ukol sa krimeng ito.

Ayon kay Justice Secretary Jesus Crispin “Boying” Remulla, “Taglay ng Kagawaran ang buong kakayahan at matibay na paninindigan upang habulin at dakpin ang mga nasa likod ng krimeng ito.

Makikipagtulungan kami sa Philippine National Police at National Bureau of Investigation upang italaga ang lahat ng kinakailangang resources para matukoy, madakip, at mapanagot ang mga may sala. Hindi kami titigil hangga’t hindi ganap na naipagkakaloob ang hustisya.”

Dagdag pa niya, “Nais naming ipabatid: hindi kami nagbibiro sa mga kasong ganito—lalo’t ang target ay mga lingkod-bayan.”

Nauunawaan ng DOJ ang hangarin ng publiko para sa mabilis na aksyon at kasagutan. Nangangako ang Kagawaran na magtatrabaho nang maingat at masigasig—sisiyasatin ang bawat pahiwatig, susuriin nang detalyado ang lahat ng ebidensya, at titingnan ang bawat posibleng anggulo upang matiyak na mapapanagot ang mga salarin sa ilalim ng batas.

“Nanawagan kami sa sinumang may impormasyon, gaano man ito kaliit—makipag-ugnayan po kayo sa mga awtoridad. Napakahalaga ng inyong kooperasyon para sa tagumpay ng imbestigasyong ito,” pagtatapos ni Secretary Remulla.

Makakamit ang hustisya para kay G. Pulhin.