“NO need for subpoena.”

Kinumpirma ni Senate President Francis “Chiz” Escudero na makikilahok ang ilang opisyal ng ehekutibo sa nakatakdang pagdinig ng Senate Committee on Foreign Relations sa Abril 10, kasunod ng kanilang unang hindi pagdalo sa imbestigasyon kaugnay ng pag-aresto kay dating Pangulong Rodrigo Duterte ng International Criminal Court (ICC).

Pinangungunahan ni Senadora Imee Marcos ang pagdinig na layuning suriin ang mga pangyayari sa likod ng pag-aresto at paglipat ni Duterte sa kustodiya ng ICC.

Ayon sa mga ulat, isinagawa ang pag-aresto batay sa isang international warrant na inilabas ng ICC noong Marso 2025, kaugnay ng mga umano’y krimen laban sa sangkatauhan.

Sa isang live interview sa DZBB, inilahad ni Escudero na siya ang namagitan upang mapadali ang pakikipagtulungan ng ehekutibo sa Senado.

“May dadalo sa pagdinig ni Senator Imee sa April 10,” ani Escudero. Bagama’t wala pa raw siyang kumpletong listahan ng mga kumpirmadong dadalo, binanggit niyang hiniling ni Senadora Marcos ang pagdalo ni Philippine National Police General Nicolas Torre III.

Una nang tumanggi ang ilang opisyal ng gabinete at militar na dumalo, iginiit ang executive privilege at sub judice rule bilang batayan dahil sa kasalukuyang mga prosesong hudisyal at internasyonal.

Upang maiwasan ang sigalot sa legal na aspeto, pinili ni Escudero ang makipag-ugnayan kaysa maglabas ng sapilitang utos.

“Hindi na kinakailangan,” aniya, at binigyang-diin na layunin nitong iwasan ang isang constitutional crisis.

Ipinunto rin ni Escudero ang mga legal na usapin kaugnay ng paglilipat ni Duterte sa ICC. Tinukoy niya ang ilang probisyon sa Konstitusyon ng Pilipinas at sa Rome Statute, at siniyasat kung paano nagsasanga ang mga karapatan sa ilalim ng Artikulo III (Bill of Rights) sa pagpapatupad ng batas ng mga banyagang hukuman.

Ipinaliwanag din niya ang doktrinang “Male captus, bene detentus” at binigyang-linaw na sa maraming kaso sa ICC, kahit may pagdududa sa legalidad ng pagkakaaresto, ay ipinagpapatuloy pa rin ang mga paglilitis.

“Sa kaso ng ICC, 8 out of 10… tinuloy pa rin nila ‘yung pagdinig,” aniya, ngunit nilinaw na hindi pa tiyak kung susunod sa ganitong landas ang kaso ni Duterte.

Sa ngayon, hindi pa inilalathala ni Senadora Marcos ang buong listahan ng mga inimbitahang resource persons para sa Abril 10 na pagdinig.

Gayunman, kinumpirma ni Escudero na naipadala na ang mga pangalan sa Office of the Executive Secretary.