IPINAGPALIBAN ng Mababang Kapulungan ng Kongreso nitong Miyerkules ang pagtanggap sa mga Artikulo ng Impeachment na ibinalik ng Senado kaugnay ng kaso laban kay Pangalawang Pangulo Sara Duterte, ilang sandali matapos nitong pagtibayin ang isang resolusyong nagpapatunay na ang prosesong isinagawa noong Pebrero 5, 2025 ay alinsunod sa Konstitusyon.

Inihain ni House Deputy Majority Leader Faustino “Inno” Dy V ang mosyon na ipagpaliban ang pagtanggap sa mga artikulo ng impeachment sa huling araw ng sesyon ng ika-19 na Kongreso.

“Ginoong Tagapagsalita, ako po ay naghahain ng mosyon na ipagpaliban ang pagtanggap sa mga Artikulo ng Impeachment hangga’t hindi pa tumutugon ang Senado—bilang Impeachment Court—sa mga paglilinaw na hiniling ng panel ng mga taga-usig kaugnay ng pagbabalik ng nasabing mga artikulo,” ani Dy.

Inulit ni Deputy Speaker Robbie Puno ang mosyon at ito’y inaprubahan.

“Ayon sa mosyon, ipagpapaliban ang pagtanggap sa mga Artikulo ng Impeachment hangga’t hindi pa tumutugon ang Senado—bilang Impeachment Court—sa mga tanong ng panel ng mga taga-usig. May tumututol ba? Wala. Kaya’t pinagtibay ang mosyon,” pahayag ni Puno.

Mas maaga sa sesyon, pinagtibay ng Kamara ang House Resolution No. 2346, na nagpapatunay na ang impeachment proceedings laban kay VP Duterte ay isinagawa alinsunod sa Article XI, Section 3, Paragraph 5 ng 1987 Constitution—kabilang na ang mga kalagayan sa likod ng pagsampa ng unang tatlong reklamong impeachment.

“Ginoong Tagapagsalita, ako’y naghahain ng mosyon na atasan ang Kalihim Heneral na maglabas ng sertipikasyon alinsunod sa pinagtibay na resolusyon,” dagdag ni Dy.

Walang tumutol, kaya’t inaprubahan ito ni Puno: “Walang pagtutol. Pinagtibay ang mosyon.”

Ayon sa resolusyon, ang verified impeachment complaint na inendorso ng mahigit isang-katlo ng mga miyembro ng Kamara ay sapat sa porma at nilalaman sa oras ng pagsampa, kaya’t ito ay awtomatikong nagsimula ng impeachment proceedings kahit walang referral sa Committee on Justice.

Pahayag sa resolusyon: “Tinitiyak ng Mababang Kapulungan ng Kongreso na ang pagsisimula ng impeachment proceedings laban sa Pangalawang Pangulo noong Pebrero 5, 2025 ay isinagawa alinsunod sa Konstitusyon, mga Alituntunin ng Kamara hinggil sa Impeachment, at umiiral na batas.”

Tinugunan din nito ang mga tanong tungkol sa pagkakasunud-sunod at timing ng iba’t ibang reklamong inihain laban sa Pangalawang Pangulo, at pinagtibay na lahat ng ito ay naisampa nang naaayon sa mga legal at konstitusyonal na batayan.

Noong Pebrero 5, 2025, pormal na sinimulan ng Kamara ang impeachment laban kay VP Duterte matapos pirmahan at iendorso ng 215 mambabatas ang isang verified complaint.

Kabilang sa mga paratang ang: matinding paglabag sa Konstitusyon, pagtataksil sa tiwala ng publiko, at maling paggamit ng confidential at intelligence funds noong siya’y kalihim ng Edukasyon noong 2022 at 2023.

Ang endorsement ng mahigit isang-katlo ng mga miyembro ng Kamara ay nagsilbing basehan upang awtomatikong ituring na sapat ang reklamo sa porma at nilalaman, kaya’t hindi na kinailangan pang idaan ito sa Committee on Justice.

Ang nasabing sertipikasyon ay bahagi ng tugon ng Kamara sa Senado na dati nang nagpahayag ng alinlangan sa proseso ng impeachment.

Iginiit ng mga lider ng Kamara na nasa kanila ang eksklusibong kapangyarihan—ayon sa Konstitusyon—na magsimula ng anumang kaso ng impeachment, at layunin ng sertipikasyon na alisin ang anumang pagdududa tungkol sa legalidad ng proseso.

Sa pamamagitan ng mga hakbang na ito, muling pinagtibay ng Kamara ang kanilang layuning ituloy ang kaso ng impeachment habang pinangangalagaan ang batas, iginagalang ang mga konstitusyonal na proseso, at pinapanatili ang prinsipyo ng checks and balances sa pagitan ng mga sangay ng gobyerno. sa Konstitusyon ang kaso laban kay VP Sara.