TIKLO ang helper dahil sa panunutok ng patalim at pagbabantang papatayin ang 22-anyos na dalaga bukod pa sa nakuhang halos P3,000 halaga ng shabu sa kanya noong Huwebes sa Valenzuela City.

Ayon sa report, naglalakad patungo sa terminal ng tricycle sa Pearl Island Compound, Malinis St., Brgy. Lawang Bato si alyas Jana dakong alas-8:00 ng gabi nang harangin siya at tutukan ng patalim ng suspek na si alyas Edmyl.

Sinabi pa umano ng suspek na “papatayin Kita Put—In—Mo.”

Sa takot ng dalaga, nagtatakbo at humingi ng tulong sa mga tauhan ng Bignay Police Sub-Station-7.

Pero sa halip na sumuko, itinapon ng binata ang patalim sabay tulak sa mga pulis at kumaripas ng takbo patakas kaya hinabol ng mga pulis at sa kamamadali nadapa kaya naaresto ng mga pulis.

Nang kapkapan, nakuha sa kanya ang 0.41 gramo ng shabu na nagkakahalaga ng P2,788.

Patung-patong na kasong grave threat, resistance and disobedience to agent of person of authority, illegal possession of deadly weapon at paglabag sa RA 9165 (Comprehensive Dangerous Drug Act of 2002) ang isasampa laban sa suspek sa piskalya ng Valenzuela City.