SA ilalim ng direktiba ni Pangulong Ferdinand “Bongbong” R. Marcos, Jr. na magsagawa ng mas agresibong operasyon laban sa mga lumalabag sa batas sa kaligtasan ng kalsada, pinatawan ng parusa ng Land Transportation Office (LTO), sa pangunguna ni Assistant Secretary Atty. Vigor D. Mendoza II at sa patnubay ng Department of Transportation (DOTr) Secretary Vince Dizon, ang 32 paaralan sa pagmamaneho sa Metro Manila at Central Luzon dahil sa iba’t ibang paglabag.

Ang mga parusa ay kinabibilangan ng suspensiyon ng operasyon ng hanggang anim na buwan at multa na umaabot sa ₱1 milyon. Ang mga paaralan na ito ay kabilang sa mga nauna nang pinadalhan ng show cause orders (SCOs) dahil sa iba’t ibang paglabag, tulad ng pagbibigay ng mga sertipiko ng Theoretical Driving Course (TDC) at Practical Driving Course (PDC) nang hindi natatapos ng kanilang mga kliyente ang kinakailangang oras ng pagsasanay, at kahit hindi dumalo sa buong kurso.

Sa Central Luzon, sinabi ni LTO-Region 3 Regional Director Ronnie Montejo na 17 paaralan sa pagmamaneho at pitong instruktor ang napatawan ng parusa.

Sinabi rin ni Montejo na may isa pang paaralan na kasalukuyang nasa ilalim ng preventive suspension habang patuloy na iniimbestigahan ang umano’y paglabag nito.

“Ang LTO Region III ay patuloy na nagtataguyod ng pananagutan sa hanay ng mga LTO-accredited na institusyon upang mapangalagaan ang kapakanan ng publiko,” ani Montejo.

“Ang ahensya ay patuloy na nagsasagawa ng regular na pag-audit, inspeksyon, at beripikasyon upang matiyak na ang lahat ng accredited driving schools at medical clinics ay sumusunod sa pinakamataas na pamantayan ng integridad at tiwala ng publiko,” dagdag niya.

Sa Metro Manila, sinabi ni LTO-National Capital Region (NCR) Regional Director Roque Verzosa III na 15 paaralan sa pagmamaneho ang pinatawan ng parusa dahil sa anomalya sa pagbibigay ng TDC at PDC.

Dagdag pa niya, 17 negosyong nagbebenta at nag-aangkat ng mga sasakyan, pati na rin apat na klinika, ang nahuling lumalabag sa umiiral na regulasyon at pinatawan din ng parusa.

“Ang aksyong ito ay bahagi ng patuloy na pagsisikap ng ahensya na siguruhin ang pananagutan, pagsunod, at integridad sa hanay ng lahat ng aming accredited stakeholders—at hindi kami titigil,” ayon kay Verzosa.

“Ang mga hakbang na ito ay nagpapakita ng pangako ng ahensya na panatilihin ang kredibilidad ng proseso ng pagpapalisensya at pagpaparehistro, gayundin ang pagprotekta sa kapakanan ng mga motorista,” dagdag niya.

Ipinaliwanag din ni Verzosa na mas pinaigting na ng LTO-NCR ang pagbabantay at pagsusuri sa mga stakeholder sa pamamagitan ng one-strike policy.

Sinabi niya na ang sinumang mapatunayang gumagawa ng iregularidad o hindi sumusunod sa pamantayan ng regulasyon ay maaaring agad na patawan ng parusa, kabilang ang suspensiyon o pagtanggal ng akreditasyon.

“Sa pamamagitan ng mas mahigpit na pangangasiwa at pagpapatupad, layunin ng ahensya na itaguyod ang disiplina sa hanay ng mga stakeholder at mapanatili ang integridad ng serbisyo publiko,” ani Verzosa.