𝗡𝗔𝗡𝗔𝗡𝗔𝗪𝗔𝗚𝗔𝗡 𝘀𝗶 𝗢𝗙𝗪 𝗣𝗮𝗿𝘁𝘆 𝗟𝗶𝘀𝘁 𝗖𝗼𝗻𝗴. 𝗠𝗮𝗿𝗶𝘀𝘀𝗮 “𝗗𝗲𝗹 𝗠𝗮𝗿” 𝗣. 𝗠𝗮𝗴𝘀𝗶𝗻𝗼 𝘀𝗮 𝗽𝗮𝗺𝗮𝗵𝗮𝗹𝗮𝗮𝗻 𝘂𝗽𝗮𝗻𝗴 𝗺𝗮𝗴𝗯𝗮𝗹𝗮𝗻𝗴𝗸𝗮𝘀 𝗶𝘁𝗼 𝗻𝗴 𝗺𝗴𝗮 𝗻𝗮𝗿𝗮𝗿𝗮𝗽𝗮𝘁 𝗻𝗮 𝗽𝗿𝗼𝗴𝗿𝗮𝗺𝗮 𝗽𝗮𝗿𝗮 𝗺𝗮𝗴𝗸𝗮𝗿𝗼𝗼𝗻 𝗻𝗴 𝘀𝗮𝗽𝗮𝘁 𝗻𝗮 𝗸𝗮𝗮𝗹𝗮𝗺𝗮𝗻 𝗮𝗻𝗴 𝗺𝗴𝗮 𝗘𝗺𝗯𝗮𝗵𝗮𝗱𝗮 𝗮𝘁 𝗞𝗼𝗻𝘀𝘂𝗹𝗮𝗱𝗼 𝘀𝗮 𝗶𝗯𝗮’𝘁-𝗶𝗯𝗮𝗻𝗴 𝗯𝗮𝗵𝗮𝗴𝗶 𝗻𝗴 𝗯𝗮𝗻𝘀𝗮 𝗸𝘂𝗻𝗴 𝗽𝗮𝗽𝗮𝗮𝗻𝗼 𝗻𝗶𝗹𝗮 𝗺𝗮𝘁𝘂𝘁𝘂𝗹𝘂𝗻𝗴𝗮𝗻 𝗮𝗻𝗴 𝗺𝗴𝗮 𝗢𝘃𝗲𝗿𝘀𝗲𝗮𝘀 𝗙𝗶𝗹𝗶𝗽𝗶𝗻𝗼 𝗪𝗼𝗿𝗸𝗲𝗿𝘀 (𝗢𝗙𝗪𝘀) 𝗻𝗮 𝗸𝗮𝘀𝗮𝗹𝘂𝗸𝘂𝘆𝗮𝗻𝗴 𝗱𝘂𝗺𝗮𝗿𝗮𝗻𝗮𝘀 𝗻𝗴 𝗺𝗲𝗻𝘁𝗮𝗹 𝗵𝗲𝗮𝗹𝘁𝗵 𝗽𝗿𝗼𝗯𝗹𝗲𝗺.

Ito ang mungkahi ni Magsino sa kaniyang privilege speech sa Plenaryo ng Kamara de Representantes patungkol sa kinakaharap na mental health problem ng mga OFWs dulot ng stress, sobrang kalungkutan at pangungulila sa kanilang pamilya.

Dahil dito, sabi ni Magsino na maiibsan ang sulIraning kinakaharap ng mga OFWs hinggil sa kanilang mental health problem kung maihahanda lamang ang mga Embahada at Konsulado sa abroad kung papaano nila matutulungan ang mga OFWs na dumaranas ng matinding depression at iba pang suliranin na nauuwi sa mental heath o sakit sa pag-iisip.

Nauna ng inilatag ng OFW lady solon sa kaniyang talumpati sa Bulwagan ng Kongreso ang labis nitong pagkabahala tungkol sa mental health problem ng mga OFWs kasunod ng kaniyang pagbibigay diin na kinakailangan ng agarang aksiyon mula sa gobyerno upang resolbahin ang nasabing problema.

Ayon kay Magsino, ang ilan sa mga problemang binabalikat ng mga OFWs na lalong nagpapalala sa kanilang sakit sa pag-iip o mental health ay ang malaking pagkakautang nila sa kanilang amo, suliranin sa kanilang kontrata at ang labis na kalungkutan.

Sinabi pa ng kongresista na ang ikinababahala din ng mga kaawa-awang OFWs ay ang kanilang pangangamba na lalo pang nagpapadagdag sa kanilang pinagdadaanang hirap o ordeal ay ang matuklasan o malaman ng kanilang mga amo na mayroon silang mental health problema na wala aniyang duda na maaari silang matanggal sa trabaho.

Bunsod nito, kaya natatakot ang mga OFWs ayon pa kay Magsino na magpatingin sa isang espesyalista dahil baka malaman ng kanilang amo ang totoong kalagayan nila.