TIGOK ang lalaki na sinaksak habang nakaupo sa nakaparadang tricycle ng hindi nakilala at tumakas na suspek sa Quezon City noong Martes.

Residente ng Lucban Compound, Brgy. Pasong Tamo, Quezon City ang 38-anyos na biktima, ayon sa pulis.

Sa report ng Criminal Investigation and Detection Unit ng Quezon City Police District (CIDU-QCPD), bandang alas-2:05 ng madaling araw naganap ang insidente sa kanto ng Kasoy St. at Durian St. sa Area 9, Brgy. Pasong Tamo.

Batay sa imbestigasyon ni P/Cpl Jordan Barbado, nakaupo sa nakaparadang tricycle ang biktima nang lapitan ng suspek na armado ng kutsilyo at sinaksak ang una sa kaliwang balikat saka tumakas.

Nakatakbo pa ang biktima at humingi ng saklolo kaya sinugod sa East Avenue Medical Center pero idineklarang dead-on-arrival bandang alas-3:10 ng madaling araw.

Nasamsam ng SOCO team ng QCPD ang kutsilyong ginamit sa pananaksak at isang plastic sachet ng shabu.