LABING-isang suspek sa halu-halong kaso ang nadakip ng mga miyembro ng Quezon City Police District (QCPD) sa 24-oras na “Warrant Day” noong Enero 2.

Kabilang sa mga nahuli ang no. 2 at 9 most wanted na kriminal sa Quezon City at Maynila dahil sa mga kasong rape, estafa, carnapping, illegal gambling, at illegal cable tapping.

Ayon kay P/Col. Randy Glenn Silvio, acting director ng QCPD, tuloy-tuloy ang operasyon ng pulisya kahit bakasyon upang matiyak na mahuhuli ang mga nagtatago sa batas.

“Walang pahinga ang QCPD. Kahit pista opisyal, hahabulin at aarestuhin ang mga wanted,” sabi ni Silvio.

Aabisuhan na ang mga korte na naglabas ng warrant upang isailalim sa tamang proseso ang mga naaresto, ayon sa hepe ng pulis.