TIGOK ang 18-anyos na security guard ng mabaril sa noo ng kanyang kabaro sa loob ng guardhouse ng Grand Acacia Grove Subdivision, Brgy. Banay-Banay, Cabuyao City, Laguna noong Miyerkules.

Kinilala ni Laguna police OIC-Provincial Director P/Col. Ricardo Dalmacia ang biktima na si Elmer Calvadores at arestado naman ang suspek na hindi pinangalanan ng pulisya.

Nakatakdang sampahan ng kasong homicide ang suspek ng Cabuyao PNP.

Base sa imbestigasyon, on duty ang dalawa dakong ala-1:00 ng hapon ng maganap ang aksidente dahil sa bagong baril ng mga guwardiya.

Ayon sa pulisya, habang inusisa ang baril sa paga-akalang walang tangay na bala itinutok ito sa noo ng biktima.

Subalit sa hindi inaasahan, sa pagkalabit ng gatilyo ng suspect bigla itong pumutok na nagresulta sa pagbulagta ng biktima.

Sinaklolohan ang biktima ng Rescue 911 ng Ospital ng Cabuyao para sa medical treatment subalit idineklarang dead on arrival ang biktima dahil sa tama sa kanyang noo.

Sinabi sa pahayag ng suspek sa pulisya na inaakala nitong walang tangay na bala ang baril ng itutok sa noo sabay kalabit ng gatilyo.

Nabawi ng pulisya ang ginamit na baril habang kasalukuyang nakapiit sa Cabuyao Detention cell ang suspek.