PORMAL na pinagtibay ng Senado ang isang resolusyon na nagbibigay-pugay kay dating House Speaker Jose de Venecia Jr. para sa kanyang makulay na karera at mga mahalagang ambag sa pamahalaan ng bansa at pandaigdigang diplomasya.

Ang resolusyon na kinilala bilang PS No. 1142, ay pormal na inihain nina Senador Loren Legarda, Nancy Binay, JV Ejercito, Sherwin Gatchalian, Joel Villanueva, at Juan Miguel Zubiri, kung saan ay nagpupugay ang Senado at nagbibigay parangal sa limang termino ni De Venecia bilang Speaker ng House of Representatives at sa kanyang papel sa pagbubuo ng makahulugang pagkakaisa sa kasaysayan ng politika sa Pilipinas.

Si De Venecia, na kilala rin bilang JDV, ay kinikilala sa pagtatatag ng “Rainbow Coalition” sa House of Representatives na nagbigay ng katatagan sa bansa matapos ang Batas Militar. Ang koalisyon na ito ay nagpadali sa pagpasa ng higit sa 200 mahahalagang batas sa ilalim ng administrasyon ng dating Pangulong Fidel V. Ramos, na sumasaklaw sa mga repormang pang-ekonomiya, pampolitika, at panlipunan.

Bukod sa kanyang mga nagawa bilang mambabatas, co-founder din si De Venecia ng partidong Lakas-Christian Muslim Democrats (Lakas-CMD), na namuno sa loob ng mahigit 15 taon, at nagsilbi siya sa iba’t ibang posisyon sa pamunuan nito. Kabilang sa mga mahalagang batas na kanyang isinulong ay ang Build-Operate-Transfer (BOT) Law, na nagtaguyod ng pakikipagtulungan ng gobyerno at pribadong sektor, at ang Military Bases Conversion Law.

Pinarangalan din ng resolusyon ang mga pagsisikap ni De Venecia sa pandaigdigang entablado, lalo na ang kanyang papel bilang tagapamagitan sa usapang pangkapayapaan sa mga grupo gaya ng Muslim separatists at mga rebeldeng Komunista. Siya rin ang nagsulong ng mga inisyatiba tulad ng Interfaith Dialogue sa United Nations na naglalayong lutasin ang mga tunggalian sa politika at relihiyon.

Bilang tagapagtaguyod ng aksyon laban sa pagbabago ng klima, nagsilbi si De Venecia bilang co-chair ng International Ecological Safety Collaborative Organization (IESCO). Ang kanyang pagsulong ng pagkakaisa sa Asya ay nagresulta sa pagtatatag ng iba’t ibang organisasyon, kabilang ang International Conference of Asian Political Parties (ICAPP) na nagbubuklod ng mga partidong politikal mula sa 52 bansa.

Dahil sa kanyang mga ambag, nakatanggap si De Venecia ng maraming parangal at pagkilala, kabilang ang French Legion of Honor at mga parangal mula sa iba’t ibang pamahalaan at institusyon sa ibang bansa. Patuloy niyang binibigyan ng impluwensya ang pandaigdigang kapayapaan at kooperasyon sa pamamagitan ng mga organisasyong gaya ng Asian Parliamentary Assembly at International Association of Parliamentarians for Peace.

Ang resolusyon ng Senado ay nagtapos sa pagbibigay-pugay kay dating House Speaker De Venecia para sa kanyang walang sawang dedikasyon sa pampublikong serbisyo, pagpapalaganap ng kapayapaan, at pandaigdigang diplomasya, na nagbibigay-inspirasyon sa mga susunod na henerasyon ng mga lider sa Pilipinas at sa buong mundo at ang kaniyang hindi matatawaran na kontribusyon sa larangan ng pulitika sa Pilipinas.