ARESTADO ang dalawang indibidwal na tumanggap umano ng package na galing sa London kung saan itinago ang 1.14 kilo ng shabu.

Ayon sa Bureau of Customs (BOC)—Port of Clark dumating ang isang package na idineklarang “unsolicited gift-baby soft toys for personal use” noong Setyembre 26 mula sa Victoria, London.

Sa isinagawang inspeksyon ay napansin umano ang kahina-hinalang laman nito kaya binuksan. Nasa loob ang dalawang headdress, isang sulat, isang kulay dilaw na plastic bag kung saan nakatago ang dalawang Star Wars Mandalorian Plush Toy.

Sa loob ng laruan ay nakatago ang tatlong asul na plastik na mayroong lamang white crystalline powder na nakumpirmang shabu sa isinagawang lab test.

Sa tulong ng mga tauhan ng Philippine Drug Enforcement Agency (PDEA) ay inilatag ang isang controlled delivery operation sa Bacoor City, Cavite na nagresulta sa pagkakaaresto sa mga suspek.