KAMPO MGEN LICERIO I. GERONIMO, Taytay, Rizal – Himas rehas ang dalawang hinihinalang tulak matapos mahulihan ng mga pakete ng shabu sa isinagawang drug buy-bust operation ng mga kapulisan sa Brgy. Poblacion Ibaba, Angono, Rizal.

Ayon kay Rizal police director PCOL Felipe B. Maraggun, bandang 2:10 ng madaling- araw nang ikinasa ng mga operatiba ng Rizal Provincial Intelligence Unit (RPIU) na may koordinasyon sa Philippine Drug Enforcement Agency (PDEA) ang nasabing operasyon sa nabanggit kung saan ay naaresto ang dalawang suspek na kinilalang sina alyas Ariel, 24, at alyas Jie, 31, parehong naninirahan sa Cainta, Rizal.

Nasabat mula sa mga suspek ang limang pakete ng hinihinalang shabu na may timbang ng humigit kumulang na 20 grams at nagkakahalaga ng P136, 000.

Kasalukuyang nasa kustodiya ng Rizal PIU Custodial Facility ang dalawang suspek para sa dokumentasyon at tamang disposisyon. Sila ay nahaharap sa kasong paglabag sa R.A 9165 o Comprehensive Dangerous Drugs Act of 2002.