Calendar
27.6M estudyante tinatanggap ng DepEd sa pagbubukas ng klase
SA pagbubukas ng klase, naghahanda ang Department of Education (DepEd) na tanggapin ang tinatayang 27.6 milyong enrollees sa basic education, sa kabila ng mga patuloy na hamon sa sektor ng edukasyon.
Pangungunahan ni Education Secretary Sonny Angara, kasama si Pangulong Ferdinand Marcos Jr., ang pormal na pagbubukas ng klase sa Epifanio Delos Santos Elementary School sa Singalong, Maynila.
Ayon sa DepEd, ang tinatayang bilang ng mga mag-aaral ay nahahati sa: 15.42 milyon sa elementarya, 8.01 milyon sa junior high school (Baitang 7 hanggang 10) at 4.17 milyon sa senior high school (Baitang 11 at 12).
Bukod dito, bibisita rin si Angara sa Tenement Elementary School sa Taguig, pati na sa dalawang paaralan sa Laguna, upang personal na suriin ang kahandaan ng mga paaralan at mga pangangailangan sa aktwal na operasyon.
Batay sa datos ng DepEd, mayroong 875,514 na guro na kasalukuyang nakatalaga sa buong bansa. Gayunman, dahil sa patuloy na pagtaas ng bilang ng mga mag-aaral, tinatayang kakailanganin pa ng karagdagang 56,050 guro sa taong 2025.
Katulad ng mga nakaraang pagbubukas ng klase, nananatiling pangunahing suliranin ang kakulangan sa pasilidad, partikular na ang mga silid-aralan, lalo na sa mga lugar na matao.
Mayroong 45,199 pampublikong paaralan sa buong bansa, marami sa mga ito ay gumagamit ng masikip o pang-maraming shift na iskedyul dahil sa kakulangan ng espasyo.
Ipinakita rin ng pinakabagong datos mula sa DepEd na lumampas na sa 165,000 ang kakulangan sa silid-aralan.
Ayon kay Angara, ang kakulangang ito ay lumalala dahil sa paglaki ng populasyon, at patuloy itong nagiging hadlang sa pagbibigay ng dekalidad na edukasyon.
Upang tugunan ito, isinusulong ng DepEd sa ilalim ng pamumuno ni Angara ang isang three-pronged strategy: pagtatayo ng 105,000 silid-aralan sa pamamagitan ng public-private partnerships; pagpapabilis ng implementasyon ng mga imprastruktura sa pamamagitan ng maagang procurement; at mahigpit na koordinasyon sa Department of Public Works and Highways (DPWH) para sa pagtatayo ng mga paaralang matibay sa kalamidad.
