HINDI pinapasok ng Bureau of Immigration (BI) noong Lunes sa Ninoy Aquino International Airport (NAIA) Terminal 1 ang apat na dayuhang nagpapanggap na bibisita sa bansa pero hinihinalang naghahanap ng ilegal na trabaho.

Hinarang ng mga tauhan ng BI ang tatlong lalaking Vietnamese na sina Truong Quang Than, 28; Bui Van Chi, 36; Ngo Dan Tuong, 22; at babaeng si Nguyen Hoang Minh Huy, 19.

Dumating ang apat sakay ng Philippine Airlines flight mula Hanoi at sinabing naglalakbay sila sa Pilipinas para mag-tour.

Sa beripikasyon, nagbigay ng hindi magkatugmang mga pahayag ang apat kaya nagduda na ang mga tauhan ng BI.

Umamin ang apat na matagal na sila nanatili sa bansa hanggang pitong buwan at umamin ang isa na nagtrabaho sa catering business sa kanyang nakaraang pananatili sa bansa.

Inilagay sa immigration blacklist ang apat para hindi na makapasok muli sa Pilipinas.