TODAS ang 5-taong gulang na batang lalaki at malubhang nasugatan ang kanyang kalaro nang mabundol ng humaharurot na taxi noong Biyernes sa Caloocan City.

Naisugod pa sa Dr. Jose N. Rodriguez Memorial Hospital ang mga biktimang sina alyas Ismael, 5, at alyas JC, 6, pero binawian din ng buhay kalaunan ang una dahil sa matinding injuries sa katawan dala ng pagkakabundol ng taxi.

Sa report ni Caloocan police chief P/Col. Paul Jady Doles, nakaupo sa kalsada ang mga biktima dakong alas-3:00 ng hapon nang biglang masagasaan ng taxi na minamaneho ni Christopher Cacho, 47, patungo sana ng Cattleya St.

Sa tindi ng pagsalpok sa dalawa, duguang tumilapon at nawalan na ng malay nang isugod sa pagamutan.

Kinasuhan ng reckless imprudence resulting in homicide and physical injury ang driver matapos maiprisinta sa Caloocan City Judicial Office para sa inquest proceedings.