SUGATAN ang isang lalaki at walong pamilya ang naabo ang bahay sa sunog sa Quezon City noong Huwebes.

Nalapnos ang paa si Michael Dacapias matapos tumalon kasama ng kanyang asawa at mga anak mula sa ikalawang palapag ng kanilang bahay na nasunog.

Ayon sa National Capital Region ng Bureau of Fire Protection (BFP), nagsimula ang sunog dakong alas-12:18 ng madaling araw at umabot sa unang alarma.

Limang barong-barong ang naabo sa kahabaan ng kalye ng Usafe sa Brgy. Holy Spirit at naapula ang apoy bandang alas-12:44 ng madaling araw.

Tumupok ng P7,500 halaga ng ari-arian ang sunog.

Pasamantalang tumutuloy sa covered court na ginawang evacuation center ang mga nasunugan.