Shabu

Pasahero mula Vietnam huli sa P43M shabu sa NAIA

Jun I Legaspi Nov 17, 2026
5 Views

NASABAT ng Bureau of Customs sa Port of NAIA (BOC-NAIA) ang humigit-kumulang 6,364 gramo ng hinihinalang methamphetamine hydrochloride o shabu na may tinatayang street value na ₱43,275,200 sa isinagawang magkasanib na interdiction operation noong 16 Nobyembre 2026 sa Ninoy Aquino International Airport (NAIA) Terminal 3.

Nagresulta ang operasyon sa pagkakaaresto ng isang dayuhang pasahero na dumating mula sa Vietnam. Natagpuan ang mga hinihinalang ilegal na droga sa loob ng isang checked-in na bagahe kung saan maingat itong itinago sa 36 na transparent plastic sachet na nakabalot sa foil pouches at selyado gamit ang tape, kasama ng mga personal na gamit ng pasahero.

Pinangunahan ang operasyon ng NAIA Inter-Agency Drug Interdiction Task Group (NAIA-IADITG) sa pamamagitan ng Philippine Drug Enforcement Agency (PDEA), katuwang ang BOC Customs Anti-Illegal Drugs Task Force (CAIDTF), Philippine National Police Aviation Security Group (PNP-AVSEGROUP), PNP Drug Enforcement Group, Airport Police Department, National Bureau of Investigation (NBI), Bureau of Immigration (BI), at Office for Transportation Security (OTS).

Matapos ang pagsasagawa ng kinakailangang dokumentasyon at pagsusuri, maayos na isinailalim sa kustodiya ng mga awtoridad ang nakumpiskang substansiya habang ang naarestong pasahero ay isinailalim sa karagdagang imbestigasyon at pagsasampa ng kaukulang kaso sa ilalim ng Republic Act No. 9165 o Comprehensive Dangerous Drugs Act of 2002 at Republic Act No. 10863 o Customs Modernization and Tariff Act.

Binigyang-diin ni District Collector Atty. Maria Yasmin M. Obillos-Mapa ang kahalagahan ng masusing inspeksiyon at matatag na koordinasyon ng mga ahensiyang nagpapatupad ng batas sa paliparan upang matukoy at maharang ang mga ipinagbabawal na substansiyang itinatago sa mga bagahe ng mga pasahero.

Sa ilalim ng pamumuno ni Commissioner Charlito Martin R. Mendoza, patuloy na pinatatatag ng Bureau of Customs ang mga hakbang nito sa pangangalaga ng hangganan sa pamamagitan ng pagpapatupad ng mga reporma at pagpapalakas ng kakayahan sa pagpapatupad ng batas sa mga pantalan at paliparan sa buong bansa.

Nananatiling matatag ang Bureau sa pagpigil sa pagpasok ng mga ilegal na droga at iba pang kontrabando upang maprotektahan ang kapakanan at kaligtasan ng sambayanang Pilipino.