Calendar
SOURCE: Larawan mula sa FB/PNP
DRIVER ARESTADO SA PARAÑAQUE SA P2.9M HINALANG KONTAMINADONG GASOLINA
ARESTADO ang isang 39-anyos na driver ng tanker matapos masabat ang humigit-kumulang 40,000 litro ng hinihinalang kontaminadong gasolina na nagkakahalaga ng ₱2.9 milyon sa isang gasolinahan sa Dr. A. Santos Avenue, Barangay San Isidro, Parañaque City, noong Nobyembre 14, 2026.
Nadiskubre ng mga tauhan ng gasolinahan ang kakaibang kulay at iba pang iregularidad sa gasolina habang ibinababa ang laman ng delivery tanker. Dahil dito, agad nilang pinatigil ang pagsasalin upang hindi umabot sa underground storage tanks ang posibleng kontaminadong produkto na maaaring makasira sa mga kagamitan ng establisimyento at sasakyan ng mga mamimili.
Ayon sa ulat, dumaan umano sa quality control procedures ang kargamento bago ito inilabas mula sa pinagmulan nito sa Subic.
Rumesponde ang mga tauhan ng San Dionisio Police Sub-Station at inaresto ang driver. Isinuko naman ang suspek, kasama ang tanker at kargang gasolina, sa Investigation and Detective Management Section ng Police Station 3 para sa dokumentasyon at karagdagang imbestigasyon.
Inihahanda ng mga awtoridad ang mga kasong Qualified Theft sa ilalim ng Article 310 at Malicious Mischief sa ilalim ng Article 327 ng Revised Penal Code. Sinusuri rin kung may naganap na pamemeke o panghihimasok sa kalidad ng gasolina, pagpapalit ng kargamento, at iba pang posibleng iregularidad.
Pinuri ni PNP Chief PGen. Jose Melencio C. Nartatez Jr. ang agarang pagkilos ng mga empleyado ng gasolinahan na nakatuklas sa problema at humingi ng tulong sa pulisya. Ayon sa kanya, nakatulong ang kanilang pagiging mapagmatyag upang maiwasan ang mas malaking pinsala sa negosyo at sa publiko.
