ISANG lalaki na suspek umano sa pagnanakaw ng motorsiklo ang nasawi ng makipagbarilan sa mga pulis sa Quezon City Sabado ng gabi.

Hindi pa nakikilala ang lalaki na inilarawang nasa 5’1” ang taas, 30-35 taong gulang, at mayroong tatoo na “ARIES” sa kanyang likuran.

Sa ulat ng pulisya, hinoldap umano ng anim na lalaki na nakasakay sa tatlong motorsiklo ang biktimang si Aldrin Amorcillo, 28, alas-10:45 kagabi. Kinuha umano ng mga suspek ang cellphone at motorsiklo ng biktima.

Agad na humingi ng tulong ang biktima sa Police Station 13 at naglatag ng dragnet sa iba’t ibang lugar.

Sa Mahogany St., Payatas Road, Barangay Payatas ay napadaan umano ang isang lalaki na nagmamaneho ng Yamaha Mio kaya pinara ito ng mga pulis.

Sa halip na huminto ay nagpaputok umano ng baril ang suspek kaya gumanti ng putok ang mga pulis.

Narekober sa suspek ang isang kalibre .38 revolver na walang serial number, tatlong bala at dalawang basyo, at isang coin purse na may dalawang sachet na pinaniniwalaang shabu ang laman.

Ang narekober na motorsiklo ay pagmamay-ari umano ng biktima.