TIKLO sa mga pulis ang dalawang dayuhang Philippine Offshore Gaming Operation (POGO) workers noong Martes sa Pasay City dahil sa pag-iingat ng iligal na droga na may tinatayang halaga na P680,000.

Kinilala ni Southern Police District (SPD) Director P/BGen. Leon Victor Rosete ang mga dinakip na Malaysian na si alyas Sing, 40, at alyas Chen, 37, na hinihinalang mga tulak ng iligal na droga.

Nagkasa ng buy-bust ang mga tauhan ng SPD District Drug Enforcement Unit (DDEU) at mga miyembro ng Sub-Station 10 ng Pasay police dakong alas-4:35 ng umaga sa parking lot ng Shore 3 Tower 3, Brgy. 76, MOA Complex matapos kumagat ang mga dayuhan sa pakikipagtransaksyon sa kanila ng police poseur-buyer.

Nakumpiska ng mga tauhan ng DDEU sa dalawa ang tinatayang 100 gramo ng shabu na may katumbas na halagang P680,000 at ang markadong salapi na ginamit sa buy-bust.

Ayon sa report, nauna nang nahulihan ng ilegal na droga ang Malaysian national.