INARESTO ng mga operatiba ng National Bureau of Investigation-Special Task Force (NBI-STF) ang apat na sangkot sa pamemeke ng mga public documents sa Sta. Cruz, Manila noong Lunes.

Naaresto ang apat na suspek sa pagbebenta ng pekeng NBI clearance, land titles, passport at iba pang dokumento sa halagang P700 hanggang P2,500.

Nakilala ang mga naaresto na sina alyas Paul, Edgardo, Jenny at isang menor de edad.

Pinepeke rin ng mga miyembro ng sindikato ang pirma ni NBI Director Jaime Santiago.

Ayon sa NBI, naaresto ang apat matapos kumagat sa test buy operations.

Narekober ng NBI-STF ang mga computers, office tools at mga dokumento tulad ng NBI clearance at certificates mula sa Philippine Statistics Authority at Land Transportation Office.