NASAKOTE at ngayo’y nasa likod na ng malamig na rehas ang 39-anyos na tricycle driver dahil sa pagbibitbit ng walang lisensyang baril noong Lunes sa Malabon City.

Matinding panic ang inabot ng bawa’t residenteng nakakasalubong ng suspek na si alyas Marvic dahil dini-display ang hawak na baril kaya’t inireport kay Malabon City Police Chief P/Col. Jay Baybayan.

Mga tauhan ng Station Intelligence Section (SIS) ang inutusan ni Col. Baybayan na pumunta sa Magsaysay St., Brgy. San Agustin ala-1:00 ng hapon at namataan ang suspek na iwinawasiwas ang dalang baril.

Pagdating ng mga tauhan ni P/Capt, Richell Sinel, hepe ng SIS, naabutan pa nila ang suspek habang hawak ang kalibre .22 magnum revolver na may dalawang bala.

Ayon kay P/SSg. Sandy Bodegon, may hawak ng kaso, sinampahan na ng kasong paglabag sa R.A.10591 (Comprehensive Law on Firearms and Ammunition Regulation Act) ang suspek sa Malabon City Prosecutor’s Office.