NAGKAROON ng arrival honors bilang bagong hepe ng National Capital Region Police Office (NCRPO) si P/BGen. Anthony Aberin sa Hinirang Multi-Purpose Hall sa Camp Bagong Diwa, Bicutan, Taguig noong Lunes.

Sinabi ni Aberin sa limang district directors ang kanyang mga programa na Able, Active at Allied o ‘Triple A’.

Isa sa mga tinutukang proyekto ni Aberin ang pagbibigay ng suporta sa kanyang mga tauhan sa pamamagitan ng training at iba pang pamamaraan upang matiyak na ‘able’ o may kakayahan ang mga ito.

Pananatilihin din ang aktibo o ‘active’ ang kapulisan sa lahat ng kriminalidad at ilegal na aktibidad.

Binigyang-diin ng bagong regional director ng Metro Manila na dapat manatiling kakampi o ‘ally’ ng publiko ang kapulisan.

Dating hepe ng Police Regional Office (PRO)-7 mula noong Marso 2023 si Aberin.