DEAD on the spot ang isang babaeng senior citizen habang sugatan ang dalawa nitong kasamahang babae makaraang araruhin ng humahagibis na closed van sa Quezon City nitong Miyerkules

Ayon sa report ng Quezon City Police District (QCPD), naganap ang aksidente sa 13th St. cor Victoria, Damayan Lagi sa nasabi ring lungsod ganap na alas-siyete ng gabi.

Sa kuha ng CCTV ng barangay, makikitang naglalakad ang tatlong magkakaibigang babae sa sidewalk ng Victoria Avenue at pagsapit sa kanto ng 13th St. ay saka naman dumating ang humaharurot na van mula sa likuran ng tatlong magkakaibigan at inararo ang mga ito.

Nabatid na ang nasawing biktima ay nadaganan pa ng gulong sa ulo.

Sa ngayon ay hawak na ng pulisya ang driver ng nakasagasang van habang mabilis na itinakbo sa St. Luke’s Medical Center ang dalawa pang babaeng biktima.

Humingi naman ng tawad ang driver sa pamilya ng nasawing biktima.

“Pasensya na po e talagang disgrasya, hindi natin kagustuhan po natin yon. Talagang wala tayong magagawa po”, ayon sa driver.