ARESTADO ang mister na umano’y pinatay sa bugbog ang kanyang misis pero pinalabas na nagpakamatay sa pamamagitan ng pagbigti sa loob ng kanilang bahay sa Quezon City.

Sa report sa Criminal Investigation and Detection Unit ng Quezon City Police District (CIDU-QCPD), bandang alas-4:00 ng hapon noong Linggo dumating mula sa trabaho ang anak ng biktima at nakitang nakahandusay sa sahig ang ina habang nire-revive ng kanyang ama.

Tinanong ng bata ang ama kung ano ang nangyari at sumagot ang suspek na nagbigti umano ang kanyang ina.

Isinugod ang biktima sa East Avenue Medical Center ngunit binawian din ng buhay bandang alas-10:16 ng gabi noong Enero 6.

Sa pagsisiyasat, iginiit ng kapatid ng biktima na hindi nagpakamatay ang kanyang ate kundi napatay sa bugbog ng asawa.

Base sa pagsusuri ng SOCO team, nagtamo ang biktima ng maraming pasa sa iba’t-ibang bahagi ng katawan ngunit walang markang ligature sa kanyang leeg.

Nakapiit na ang suspek habang sumasailalim sa imbestigasyon.