TIKLO dahil sa pagwawala at panghahalihaw ng saksak ang 28-anyos na lalaki noong Lunes sa Malabon City.

Pasado alas-2:00 ng madaling araw nang makarating kay Malabon police chief P/Col. Jay Baybayan ang reklamo laban sa suspek na si alyas Enrico na noo’y naghahamon, nananakot at nanghahalihaw ng saksak sa hindi pa batid na dahilan.

Kaagad rumesponde sa lugar ang mga tauhan ng Police Sub-Station-5 at inabutan pa nila si alyas Enrico na nagsisigaw at naghahamon ng away habang hawak ang isang patalim.

Tinangkang awatin ng mga pulis ang suspek pero lalo lang nagwala, hindi iginalang ang mga pulis at nagtangka pang manlaban kaya’t ginamitan na siya ng puwersa upang maagaw ang hawak na patalim at tuluyang mapasuko.

Sinabi ni Col. Baybayan na sasampahan nila ng kasong paglabag sa B.P Blg. 6 o possession of deadly weapon at alarm and scandal ang suspek sa Malabon City Prosecutor’s Office.