KULONG ang 45-anyos na kelot ng tutukan ng baril ang pinagkakautangan na naningil sa kanya noong Huwebes sa Valenzuela City.

Arestado si alyas Noel nang makahingi ng saklolo ang biktimang si alyas Ray, 38, matapos siyang tutukan ng baril sa dibdib ng suspek pasado alas-5:00 ng hapon.

Sa salaysay ng biktima, mistulang maamong tupa ang biktima nang lumapit sa kanya para mangutang may ilang linggo na ang nakararaan subalit mula noon hindi na nagpakita sa kanya.

Nang matiyempuhan ng biktima ang suspek sa kanilang lugar sa La Huerta St., Brgy. Marulas, siningil niya ang suspek pero sa halip na magbayad, baril ang hinugot sa baywang na itinutok sa biktima.

Nagkataong nagpapatrulya sa malapit sa lugar sina P/Capt. Manuel Cristobal, hepe ng Police Sub-Station-3, na nahingan ng tulong ng biktima kaya’t inabutan pa ng mga pulis ang suspek na naglalakad ng palayo.

Nakuha kay alyas Noel ang isang kalibre .38 paltik na revolver na may isang bala.