KULONG ang napala ng 45-anyos na lalaki matapos matimbog noong Sabado sa akto na hinihimas pa ang kanyang walang lisensyang baril sa Caloocan City.

Sinita ng mga tauhan ni Caloocan police chief P/Col. Edcille Canals si alyas Wilfredo habang hinihimas ang hawak na kalibre .38 revolver dakong alas-5:20 ng umaga sa Phase 7C, Bagong Silang, Brgy. 176-C.

Nang tanungin kung may kaukulang dokumento ang suspek sa pag-iingat at pagdadala sa labas ng bahay ng naturang armas, walang maipakita si Wilfredo kaya diretso aresto ang inabot niya. Kinumpiska din ang baril at dalawang bala na nasa chamber.

Kasong paglabag sa RA 10591 (Comprehensive Firearms and Ammunition Act) at paglabag sa Omnibus Election Code ang kakaharaping kaso ng suspek sa Caloocan City Prosecutor’s Office.