NILINAW ng pamunuan ng Quezon City Police District (QCPD) ang isang viral video na kumakalat online, na nagpapakita ng dalawang lalaki sa loob ng drainage manhole malapit sa Trinoma/Landmark Mall, na matatagpuan sa kanto ng EDSA at Mindanao Avenue, sa Barangay Bagong Pag-asa, Quezon City, noong Lunes ng hapon.

Sa isinagawang imbestigasyon ng QCPD, nakumpirma na ang mga lalaki sa video ay kinuha ng kanilang kapitbahay upang ayusin ang isang nasirang water hose na matatagpuan sa ilalim ng drainage system sa lugar.

Habang isinasagawa ang pagkukumpuni, nagsimula ang malakas na ulan, na naging sanhi ng mabilis na pagtaas ng lebel ng tubig sa loob ng drainage.

Upang maiwasang ma-trap, naghanap ng alternatibong labasan ang dalawa at kalaunan ay may nakita silang maliit na butas sa drainage system.

At doon ay nakita silang humihingi ng tulong, gaya ng nakunan sa viral footage.