ANG kapalaran ni Vice President Sara Duterte ay nakasalalay sa Korte Suprema (SC) dahil ito ang “pinakahuling tagapamagitan” ng batas at ito rin ang magbibigay ng pinal na desisyon kaugnay ng kanyang kasong impeachment, ayon sa Malacañang nitong Biyernes.

Sa panayam ng mga mamamahayag sa PR001, sinabi ni Palace Press Officer Claire Castro na hindi pa naglalabas ng desisyon ang SC sa inihaing motion for reconsideration na humihiling na baligtarin ang naunang desisyon ng hukuman na nagdeklara sa Articles of Impeachment laban kay Duterte bilang labag sa Konstitusyon.

“Noon pa natin sinagot ito. Kung anuman ang magiging desisyon ng Supreme Court, ‘yan ay igagalang ng Pangulo, ng Ehekutibo. Bakit? Dahil ang Supreme Court ay ang final arbiter ng anumang legal na usapin,” ani Castro.

“Kaya, dahil may motion for reconsideration pa, tingnan na lang natin kung ano ang magiging pasya rito ng Supreme Court.”

Noong Miyerkules, inaprubahan ng Senado ang mosyon ni Senador Rodante Marcoleta na “sumunod sa agarang ipinatutupad na desisyon” ng SC, na epektibong nag-archive sa reklamo ng impeachment.

Sa isang nagkakaisang desisyon noong Hulyo 25, idineklara ng SC en banc na walang hurisdiksyon ang Senado sa naturang impeachment proceedings. Ayon sa desisyon, nilabag ng reklamo ang probisyon sa Konstitusyon ukol sa “one-year rule” at ang karapatang makamit ang due process na nakasaad sa Bill of Rights.

Sa isang press briefing sa kanyang state visit sa India noong Biyernes, sinabi ni Pangulong Marcos na ang desisyon ng SC ukol sa kaso ni Duterte ay hindi tumalakay sa merito ng reklamo, kundi pawang mga isyung pormal o procedural lamang ang tinugunan.

Iginiit ni Castro na walang intensyon sina Marcos at ang Malacañang na makialam sa impeachment laban kay Duterte.

“Well, unang-una siguro dapat mapaalala sa ating Bise Presidente na hindi ang administrasyon ni Marcos Jr., hindi ang Ehekutibo ang nagsampa o nagsumite ng Articles of Impeachment kundi ang Mababang Kapulungan o House of Representatives,” aniya.

“Kaya noon pa sinasabi natin na ang Pangulo, ang Ehekutibo ay hindi mangingialam sa trabaho ng House of Representatives at ng Senado.” PNA