IPINAGDIRIWANG ng Philippine National Police (PNP) nitong Agosto 12 ang kanilang ika-124 na Anibersaryo ng Serbisyo ng Pulisya na may mataas na antas ng kasiyahan mula sa publiko, na pangunahing iniuugnay sa programang 911 at 5-minute response time na naipatupad mula nang maupo si PGen. Nicolas D. Torre bilang hepe ng PNP noong Hunyo 2.

Batay sa pinakahuling Tugon ng Masa nationwide survey na isinagawa ng Octa Research, nakamit ng PNP ang 71 porsyentong trust rating mula sa publiko noong Hulyo—mas mataas kaysa sa 62 porsyentong nakuha nila noong Abril ng parehong taon, o umakyat ng 9 percentage points.

Samantala, nakatanggap din ang organisasyon ng 73 porsyentong performance rating nitong Hulyo, mula sa 62 porsyento noong Abril—tumaas ng 11 percentage points mula sa nakaraang survey.

Pangungunahan ni Pangulong Ferdinand R. Marcos Jr. ang pagdiriwang ng ika-124 na PSA sa Camp Crame sa gitna ng panawagan ni Torre sa lahat ng opisyal at tauhan ng 232,000-kataong pwersa ng pulisya na ibigay ang kanilang pinakamahusay para sa sambayanang Pilipino, at ipabatid na “ang kahusayan ay hindi lang isang araw na gawain, kundi naging ugali na” sa hanay ng PNP.

Ayon kay Torre, naging saksi ang kapulisan sa mga “pagbabago, hamon, at tagumpay” ng bansa sa paglipas ng mga taon. Kaya’t kailangan nilang tiyakin sa Pangulo at sa sambayanang Pilipino na maaasahan ang PNP, sa kabila ng mga kritisismong kanilang natatanggap.

“Wag tayong magpadala. Huwag tayong mawala sa direksyon—iisa ang ating pwersa, nagkakaisa at handang maglingkod. Maging malinaw tayo sa ating layunin, manatiling matatag, manatiling maagap, at magkaisa sa pagtatrabaho dahil bawat araw ay araw ng PNP—bawat araw tayo ay naglilingkod, bawat araw tayo ay nagpoprotekta,” pahayag ni Torre.

Dagdag pa niya, malaking pag-angat ang resulta ng survey mula sa kanilang mga naunang ratings.

“Sana ay mapataas pa natin. Anumang hamon, anumang laban—ang PNP ay nananatiling matatag, nagkakaisa para sa kaayusan ng bayan,” aniya.

Kinumpirma rin ng Octa Research survey na ang PNP ay kabilang sa pinakapinagkakatiwalaan at pinakamahusay na gumaganap na ahensya ng gobyerno para sa Hulyo 2025, ayon kay Police Community Affairs and Development Group Director, Brigadier Gen. Marvin Joe C. Saro.

Ayon sa survey, mababa rin ang antas ng hindi pagtitiwala at hindi kasiyahan ng publiko, kung saan 6 porsyento lamang ang nagsabing sila’y hindi nagtitiwala, at 7 porsyento ang hindi nasisiyahan sa serbisyo ng pulisya. Ang natitirang porsyento ay hindi tiyak ang sagot.

Nagpahayag ng pasasalamat ang pamunuan ng PNP sa tiwala at suporta ng sambayanang Pilipino, na ayon sa kanila, ay hindi lamang basta numero kundi repleksyon ng sipag, dedikasyon at katapatan ng bawat pulis sa pagtupad ng kanilang tungkulin, ayon sa panata ng paglilingkod nang may integridad at kahusayan.

Ang 5-minute response time program ni Torre ay nakikita bilang isang malaking salik sa positibong rating na ibinigay sa kapulisan.

Ang Hulyo 2025 Tugon ng Masa Survey ay isinagawa sa pamamagitan ng harapang panayam sa 1,200 adult respondents mula Hulyo 12 hanggang 17 ngayong taon. Mayroon itong ±3 porsyentong margin of error at 95 porsyentong confidence level.