NAREKOBER ng Quezon City Police District (QCPD) ang ginamit na getaway motorcycle ng mga pinaghihinalaang gun-for-hire na pumatay sa 75-anyos na negosyanteng si Ceferino “Perry” Mariano at sa kanyang drayber sa kahabaan ng Timog Avenue noong Huwebes ng hapon.

Kasabay nito, iniutos ni Philippine National Police (PNP) chief General Jose Melencio C. Nartatez Jr. sa QCPD na pinamumunuan ni Brigadier General Randy Glenn G. Silvio na masusing imbestigahan ang madugong pamamaril at huwag palampasin ang anumang detalye.

“Nais ni Gen. Nartarez ang agarang hustisya para sa mga biktima at kanilang pamilya,” ayon kay PNP spokesperson Brig. Gen. Randulf T. Tuaño.

Ayon kay Brig. Gen. Silvio, agad tumakas ang dalawang suspek matapos ang pamamaril at iniwan ang kanilang getaway motorcycle sa Scout Rallos Street malapit sa kanto ng Scout Ybardolaza bago tumakas nang naglalakad.

Naglakad umano ang mga ito patungong Scout Borromeo kung saan sumakay sila ng tricycle at nagpasundo papuntang Quezon Avenue. Pagdating sa sangay ng Mercury Drug sa Quezon Avenue, sumakay naman sila ng pampasaherong jeep.

Narekober din ng QCPD Scene-of-the-Crime Operatives (SOCO) ang crash helmet ng mga suspek na iniwan din sa Scout Rallos.

Kinuha rin ng SOCO team ang mga latent fingerprint na naiwan sa kaliwa at kanang side mirror ng getaway motorcycle. Kinukuha rin ang DNA ng mga suspek mula sa crash helmet na kanilang iniwan.

Sinabi ni Brig. Gen. Silvio na bumuo na siya ng Special Investigation Team (SIT) upang tutukan ang kaso ng dobleng pagpatay.

Ayon kay Lieutenant Colonel Zachary Capellan, commander ng QCPD Station 10 at miyembro ng SIT, nagpalit ng damit ang mga suspek sa lugar kung saan nila iniwan ang motorsiklo.

“Nagpalit sila ng damit pero nilagay nila ang mga dating damit nila sa supot na dinala nila bago tumakas,” aniya.

Sa isinagawang imbestigasyon, lumabas na ang Vehicle File Number 1303-0900433 na nakakabit sa getaway Yamaha Mio ng mga suspek ay orihinal na nakarehistro sa isang Honda Click.

Nakapagbigay na rin ng pahayag ang rehistradong may-ari ng Honda Click sa SIT.

“Malinaw na kinopya at nireprodyus ng mga suspek ang MV File Number ng Honda Click,” ayon sa opisyal. Pinaniniwalaan ng QCPD na mga propesyonal na mamamatay ang mga suspek na gumamit ng ibang MV file number upang iligaw ang imbestigasyon.

Sa kuhang video ng aktwal na pag-atake, makikita na ang drayber ng Yamaha Mio ay nakasuot ng itim at berdeng helmet, asul na long-sleeved shirt na may berdeng reflectorized na guhit, abong shorts at itim na sapatos.

Ang backrider na gunman na armado ng kalibre .45 na baril ay nakasuot ng abong helmet, puti at abong polo shirt at tsinelas.

Ayon kay Lt. Col. Capellan, agad silang naglabas ng flash alarm at nagsagawa ng malawakang dragnet operation matapos maiulat sa kanila ang insidente.

“Inabisuhan namin ang mga patrol sa Timog Avenue, Tomas Morato at Kamuning upang harangin ang mga suspek base sa kanilang deskripsyon. Ngunit lumabas na agad nilang inabandona ang kanilang motorsiklo,” aniya.

Si Mariano, na kilalang negosyante na may mga bar at bilyaran, at ang kanyang 51-anyos na drayber ay kapwa namatay habang ginagamot sa East Avenue Medical Center.

Pinaniniwalaang sinundan ng mga suspek ang mga biktima mula sa isa pang establisyemento sa Quezon City bago umatake. “Nakita ang mga suspek sa naunang lugar na pinuntahan ng mga biktima,” ayon kay Capellan.

Idineklarang dead on arrival ang drayber alas-4:49 ng hapon habang si Mariano ay binawian ng buhay makalipas ang dalawang oras.

Nagtamo si Mariano ng apat na tama ng bala sa katawan, isa sa puwitan at isa sa siko, habang ang kanyang drayber ay tinamaan sa kanang braso at katawan. Napag-alamang nagpalit pa ng magazine ang gunman habang nagpapaputok.

Siyam na basyong bala ng kalibre .45 at tatlong slug ang narekober sa loob ng sasakyan ni Mariano.

Dalawang MMDA enforcer na malapit sa pinangyarihan ang agad na nag-ulat ng insidente sa QCPD.

“Isinasagawa ang masusing imbestigasyon upang matukoy ang pagkakakilanlan at kinaroroonan ng mga suspek at matukoy ang motibo ng krimen,” ayon kay Brig. Gen. Silvio.

Dagdag pa niya, magtatrabaho nang walang tigil ang SIT Mariano upang matiyak ang agarang pag-aresto sa mga suspek at sa mga nag-utos ng krimen, kasabay ng pakikiramay ng QCPD sa mga naulilang pamilya ng mga biktima.

Ayon kay Lt. Col. Capellan, paunang tinitingnan na maaaring may kaugnayan sa negosyo ang motibo ng pagpatay, bagamat hindi nila isinasantabi ang iba pang posibleng dahilan.

Inilabas na rin ng opisyal ang mga larawan ng mga suspek at nanawagan sa publiko na tumawag sa Emergency Hotline 911, Q.C. Helpline 122, o sa hotline na 09985987960 kung may impormasyon na makatutulong sa kanilang pagkakaaresto.

Tiniyak niya na mananatiling lihim ang pagkakakilanlan ng mga magbibigay ng impormasyon.