HINDI bababa sa apat na katao ang kumpirmadong nasawi habang 16 iba pa ang nananatiling nawawala matapos gumuho ang isang 9-palapag na gusaling nasa ilalim ng konstruksyon sa Angeles City madaling araw ng Linggo.

Sa situation report na inilabas ng Police Regional Office 3 (PRO3), sinabi na hanggang alas-7:40 ng umaga nitong Lunes, may kabuuan ng 47 indibidwal ang sangkot sa insidente sa kanto ng Oak at Teodoro Streets sa Barangay Balibago.

Ayon sa mga awtoridad, 26 katao na ang nailigtas kabilang ang isang Malaysian national na kinilalang si Mohd Yazid Bin Abdullah.

Tatlong nasawi ang nakumpirma, kabilang ang isang Malaysian national na si Mohd Rezal Bin Abdullah, Mark Laurence Sapungay, at Porperio Alikaway, batay sa paunang ng incident command post.

Isa pang tao ang kasalukuyang isinasailalim sa rescue operation sa Sector 2 ng gumuhong istruktura habang nagpapatuloy ang paghahanap ng mga rescue team sa mga nawawalang indibidwal.

Gumuho ang gusali bago magbukang-liwayway noong Linggo dahilan upang magsagawa ng malawakang multi-agency rescue operation na kinabibilangan ng mga pulis, bumbero, tauhan ng coast guard, militar, at disaster response teams.

Itinalaga si Police Major Ronan James C. Eblahan ng Angeles City Police Station 4 bilang ground commander na nangangasiwa sa operasyon sa lugar.

Kabuuang 744 na tauhan mula sa iba’t ibang ahensya ng gobyerno ang ipinakalat para sa nagpapatuloy na rescue mission.

Kabilang dito ang 112 personnel mula sa mga yunit ng PRO3, 325 miyembro ng Bureau of Fire Protection Regional Office 3, 255 personnel mula sa BFP Special Rescue Unit ng National Capital Region, gayundin ang mga responder mula sa Philippine Coast Guard, Philippine Red Cross, Angeles City Disaster Risk Reduction and Management Office, at Armed Forces of the Philippines.

Kabilang sina PRO3 director Brig. Gen. Jess Mendez at Angeles City Police Office chief Col. Joselito Villarosa Jr. sa mga nasa lugar upang pangasiwaan ang nagpapatuloy na operasyon.

Patuloy pa rin ang monitoring at clearing operations sa lugar, at sinabi ng mga awtoridad na maglalabas pa sila ng panibagong progress report sa oras na may mahahalagang pag-unlad sa insidente.