PINUNTAHAN at hinalughog ng pinagsanib na operatiba ng Philippine National Police-Criminal Investigation and Detection Group (PNP-CIDG) at National Bureau of Investigation (NBI) ang isang bahay sa loob ng subdivision sa Angeles City bilang bahagi ng nagpapatuloy na paghahanap kay Senador Ronald “Bato” M. dela Rosa.

Ayon sa impormasyon, ang target na bahay ay pagmamay-ari umano ng isang “Choly,” dating kadete ng Philippine Military Academy (PMA) na sinasabing dapat sana’y naging kaklase ni dating PNP chief dela Rosa sa PMA “Sinagtala” Class of 1986.

Ang naturang lalaki, na madalas umanong bumibisita noon sa Camp Crame noong si dela Rosa pa ang hepe ng PNP, ay pinayagan umano ang mga operatiba ng CIDG at NBI na magsagawa ng paghahanap sa loob ng kanyang ari-arian dahil alam niyang may legal na kautusan mula sa korte ang mga ito.

Gayunman, walang natagpuan ang mga awtoridad sa isinagawang operasyon.

May mga ulat ding nagsasabing ang bahay ay pagmamay-ari umano ng tiyuhin ni Senador Robin Padilla, na haharap sa kasong obstruction of justice sa Department of Justice dahil sa umano’y pagtulong kay dela Rosa na makatakas mula sa Senado.

Isinagawa ang operasyon sa Angeles City habang tiniyak ni PNP chief General Jose Melencio C. Nartatez Jr. sa publiko na walang espesyal na pagtrato na ibibigay kay dela Rosa sa kabila ng mga pagdududang may ilang pulis na hindi umano pursigidong tugisin ang mambabatas.

Naglabas ng pahayag ang PNP chief matapos mabahala ang ilan na maaaring maging maluwag ang ilang pulis kay dela Rosa dahil sa matagal nitong koneksyon sa hanay ng kapulisan.

Si dela Rosa ang kauna-unahang PNP chief na itinalaga ng ngayo’y nakakulong na dating Pangulong Rodrigo R. Duterte sa loob ng anim na taong panunungkulan nito.

Ang miyembro ng PMA “Sinagtala” Class of 1986 ay nagsilbing ika-21 hepe ng 232,000 miyembrong PNP mula Hulyo 1, 2016 hanggang Abril 19, 2018 at naging kilala sa pangangasiwa ng kontrobersyal at madugong “war on drugs” ng administrasyong Duterte. Nahalal siyang senador noong 2019 sa kanyang unang pagtakbo.

Gayunman, nilinaw ni Gen. Nartatez na nananatiling nakatali ang organisasyon sa batas at sa mandato nitong maglingkod sa publiko nang walang kinikilingan.

“The Philippine National Police operates strictly on legal frameworks and our sworn oath to serve and protect, meaning no individual is above the law regardless of rank or title,” ayon sa PNP chief.

Binigyang-diin din niya na kahit may institusyonal na paggalang ang hanay ng pulisya kay dela Rosa bilang dating hepe ng PNP, hindi ito makaaapekto sa kanilang operasyon.

“While our ranks maintain an institutional respect for Sen. Bato dela Rosa as a former PNP chief, we assure the public that there will be no special treatment, and our personnel will execute all lawful directives with absolute professionalism, impartiality, and transparency,” ani Gen. Nartatez.

Iniutos din ng PNP chief sa lahat ng police units na mahigpit na sundin ang standard operating procedures sa anumang operasyon kaugnay kay dela Rosa, na nahaharap sa arrest warrant mula sa International Criminal Court (ICC) kaugnay ng kampanya kontra ilegal na droga ng nakaraang administrasyon.

Inatasan din niya ang mga commander na iwasan ang anumang preferential treatment at pigilan ang unauthorized disclosures na maaaring makaapekto sa legal na proseso.

Ayon kay Gen. Nartatez, nakikipag-ugnayan din sila sa iba’t ibang ahensya ng gobyerno upang matiyak ang maayos na pagpapatupad ng anumang legal na hakbang laban kay dela Rosa.

Dagdag pa niya, inaasahan niyang mananatiling disiplinado ang lahat ng opisyal at pananatilihin ang integridad ng serbisyo sa panahong mataas ang pagbabantay ng publiko.

“We expect all officers to uphold standard operating procedures without fear or favor, and we explicitly appeal to Senator Dela Rosa’s enduring sense of duty as a lifelong law enforcer to cooperate fully with the legal process,” aniya.

Sinabi rin ng PNP chief na ang magiging kilos ng mga pulis sa mga susunod na araw ay magsisilbing sukatan ng kredibilidad ng institusyon at ng kanilang paninindigan sa pananagutan.

“The eyes of the nation are on us, and the PNP will remain a professional, disciplined institution that honors the badge by executing its mandates with maximum restraint, strict adherence to human rights, and total accountability,” dagdag niya.