INARESTO ng mga pulis ang 44-anyos na immigration officer na nasa listahan ng Most Wanted Person sa Benguet dahil sa kasong qualified trafficking sa Makati City noong Miyerkules.

Nahuli ng mga tauhan ni Southern Police District (SPD) Director P/BGen. Glenn Oliver Cinco si alyas Rolando sa A.P. Reyes Avenue, Brgy. Carmona dakong alas-3:30 ng hapon.

Ayon kay Makati police chief P/Col. Pedro Alagano, Jr. isinilbi ang arrest warrant galing kay La Trinidad, Benguet Regional Trial Court (RTC) First Judicial Region Presiding Judge Isagani Gomez-Calderon ng Branch 8 sa akusado para sa kasong qualified trafficking na walang inirekomendang piyansa.

Binigyang-diin ni P/BGen. Cinco na walang pinipili ang kapulisan sa pagdakip sa sinumang nasasangkot sa krimen o may nakabimbing kaso.

Nakapiit si alyas Rolando sa custodial facility ng Makati police.