UMAPELA nitong Linggo ang kampo ng dating House Speaker Ferdinand Martin G. Romualdez sa Ombudsman na maging patas sa pamamagitan ng pagbibigay sa kongresista ng Leyte ng pagkakataong tumugon o magbigay ng komento sa anumang bagong alegasyon laban sa kanya.

Ginawa ni Ade Fajardo, legal counsel at tagapagsalita ng mambabatas, ang apela kasunod ng mga espekulasyon na maaaring pinipilit ang dating Department of Public Works and Highways (DPWH) Secretary Manuel Bonoan na iugnay si Romualdez sa umano’y flood control scam.

Sa kahilingan ng Ombudsman, inalis si Bonoan sa kasong plunder at graft na nagkakahalaga ng P573 milyon at pinalaya mula sa pagkakadetine ng tatlong miyembrong Sandiganbayan Fifth Division sa isang kontrobersiyal na desisyon na mariing binatikos ng isang miyembro ng dibisyon na tumutol sa ruling.

“Humihiling kami sa Ombudsman na ipaalam sa amin kung may anumang alegasyon si Secretary Bonoan laban kay dating Speaker Romualdez at bigyan kami ng sapat na panahon upang magkomento rito,” sabi ni Fajardo.

“Mayroon ding ulat na may 28 bagong testigo ang Ombudsman. Nais naming malaman kung may anumang pahayag mula sa kanila laban sa aming kliyente, at nais din naming mabigyan ng pagkakataong tumugon,” aniya.

“Ang patas na pagtrato at due process ay nangangailangan na ibigay sa amin ang naturang impormasyon at pagkakataon sa yugtong ito ng proseso, ang preliminary investigation stage, at hindi lamang kung at kapag nagpasya ang Ombudsman na magsampa ng kaso sa korte,” diin niya.

Itinuro ni Fajardo na ang anumang bagong alegasyon laban kay Romualdez ay hindi saklaw ng mga nauna niyang pleading na isinumite sa Ombudsman.

Noong Agosto 20, naghain ang kongresista ng Leyte ng supplemental affidavit kung saan hiniling niya sa Ombudsman na itigil ang preliminary investigation laban sa kanya, na binanggit ang pagbawi sa mga alegasyong ginawa ng limang Maleta Boys, kabilang si Orly Guteza, na unang testigong lumitaw kaugnay ng umano’y flood control scam.

Kasama rin sa kanyang inihain ang mga pahayag ng 25 kasamahan ng Maleta Boys na pinasinungalingan ang mga orihinal na akusasyong ginawa ng grupo.

Sa kanyang pagbawi sa naunang pahayag, sinabi ni Guteza na pinilit umano siyang gumawa ng mga pahayag laban kay Romualdez nina Sen. Rodante Marcoleta at dating Quezon City congressman Mike Defensor. Itinanggi naman ng dalawa ang naturang alegasyon.

“Dahil sa takot at pangamba, lahat ng nakasaad sa affidavit na kanilang inihanda ay mga bagay na sinabi kong nasaksihan ko, kahit hindi naman ito totoo; kabilang dito ang pahayag na nakilahok ako sa tatlong paghahatid ng mga maleta sa sinasabing tirahan ni Speaker Martin Romualdez. Wala akong naging direktang pakikipag-ugnayan kay Speaker Romualdez, at hindi ko man lang siya nakita sa naturang address,” sabi ni Guteza sa kanyang sinumpaang statement of retraction.

Muling iginiit ni Fajardo na dahil sa pagbawi nina Guteza at apat pang Maleta Boys, gayundin sa mga pahayag ng 25 sa kanilang mga kasamahan, wala nang “mapagkakatiwalaang ebidensiya” laban kay Romualdez.

Muli rin niyang sinabi na hindi iniugnay ni Bonoan o ng alinman sa kanyang mga engineer o tauhan sa DPWH si dating Speaker Romualdez sa flood control scam, o sa anumang maanomalyang flood control project o kickback.

“Wala ni isa sa kanila ang nag-akusa mula nang sumiklab ang kontrobersiyang ito mahigit isang taon na ang nakalipas. Siyempre, ikagugulat namin, para sabihin na lamang, kung may alegasyon na lilitaw ngayon o sa hinaharap,” aniya.