DAHIL sa pagiging mailap at hindi pakikipagtulungan, kinondena ng House quad committee noong Huwebes ng gabi si dating Bamban, Tarlac Mayor Alice Guo at inutos ang kanyang detensyon.

Sa kasalukuyan, hindi pa tiyak ng panel kung saan ikukulong si Guo habang hinihintay ang clearance mula sa ahensyang may kustodiya sa kanya.

Iniimbestigahan si Guo dahil sa umano’y pagkakasangkot sa mga iligal na Philippine offshore gaming operator (POGO) at iba pang kriminal na aktibidad.

Patuloy na tinatalakay ng joint panel, na nagsusuri sa pagtaas ng krimen kaugnay ng iligal na POGO, kung saan ikukulong si Guo, lalo na’t may usapin tungkol sa hurisdiksyon sa kanyang kustodiya.

Kasalukuyang nasa kustodiya ng Philippine National Police (PNP) si Guo dahil sa kasong human trafficking na kinakaharap sa korte, bukod pa sa contempt order na inilabas ng Senado.

Ayon kay Surigao del Norte 2nd District Rep. Robert Ace Barbers, overall chair ng quad committee, pinaboran niya ang mosyon ni Abang Lingkod Rep. Joseph Stephen Paduano na ideklarang in contempt si Guo, alinsunod sa Section 11, Paragraph C ng House Rules of Procedure Governing Inquiries in Aid of Legislation.

“May mosyon na ideklarang contempt si Alice Guo, a.k.a. Guo Hua Ping. May pagtutol ba? Wala, kaya aprubado ang mosyon,” sabi ni Barbers.

Sa kasunod na mosyon ni Paduano, hiningi nito na si Guo ay ikulong hanggang matapos ang imbestigasyon ng komite at mai-adopt ang ulat sa plenaryo, na inaprubahan din ni Barbers.

Sa pagdinig, ipinahayag ni Paduano, na sumusuporta sa interpellation ni Nueva Ecija 3rd District Rep. Emerson Pascual, ang kanyang pag-aalala sa pagtanggi ni Guo na magpiyansa kahit na P180,000 lang ang halaga nito.

Sinabi pa niya na sadya itong hindi nagpiyansa dahil mas gusto umano nitong manatili sa PNP Custodial Center sa Camp Crame, Quezon City.

“Hindi ka nag-bail kasi mas gusto mong naka-detain doon sa PNP custodial facility kaya hindi ka nag-bail. Ayan ang totoong kwento doon. Huwag na tayo maglokohan dito,” sabi ni Paduano.

“Again, you’re lying. You’re fooling this country, you’re fooling the Filipino people,” dagdag pa niya.

Sa naunang bahagi ng pagdinig, kinumpirma ng quad comm na si Guo, isang Chinese national, ay gumamit ng mga butas sa legal at identification system ng Pilipinas upang makapagtayo ng mga negosyo na hinihinalang konektado sa iligal na sindikato.

Si Guo, na sentro ng ilang kriminal na imbestigasyon, ay naging sanhi ng galit ng publiko dahil sa pagkakasangkot sa human trafficking at iligal na POGO operations.

Inakusahan siyang tumulong sa pagpasok ng mga dayuhang manggagawa, marami sa kanila ay pinaghihinalaang sangkot sa iligal na aktibidad tulad ng prostitusyon at panloloko, sa ilalim ng maskara ng legal na trabaho.

Matagal nang pinaghihinalaan ng mga awtoridad na si Guo ay may malalapit na kaugnayan sa mga makapangyarihang sindikato sa bansa, at ang kanyang mga negosyo ay hinihinalang ginamit bilang harap o pangpronta para sa iba’t ibang iligal na operasyon.