𝗠𝗨𝗟𝗜𝗡𝗚 𝗽𝗶𝗻𝗮𝗻𝗶𝗻𝗶𝗻𝗱𝗶𝗴𝗮𝗻 𝗻𝗴 c𝗵𝗮𝗶𝗿𝗺𝗮𝗻 𝗻𝗴 𝗛𝗼𝘂𝘀𝗲 𝗖𝗼𝗺𝗺𝗶𝘁𝘁𝗲𝗲 𝗼𝗻 𝗗𝗮𝗻𝗴𝗲𝗿𝗼𝘂𝘀 𝗗𝗿𝘂𝗴𝘀 𝗻𝗮 𝘀𝗶 𝗦𝘂𝗿𝗶𝗴𝗮𝗼 𝗱𝗲𝗹 𝗡𝗼𝗿𝘁𝗲 𝟮𝗻𝗱 𝗗𝗶𝘀𝘁. 𝗖𝗼𝗻𝗴. 𝗥𝗼𝗯𝗲𝗿𝘁 𝗔𝗰𝗲 𝗦. 𝗕𝗮𝗿𝗯𝗲𝗿𝘀 𝗻𝗮 𝗵𝗶𝗻𝗱𝗶 𝗺𝗶𝗻𝗮𝗺𝗮𝗻𝗱𝘂𝗵𝗮𝗻 𝗼 𝗱𝗶𝗻𝗶𝗱𝗶𝗸𝘁𝗮𝗵𝗮𝗻 𝗻𝗴 𝗹𝗶𝗱𝗲𝗿𝗮𝘁𝗼 𝗻𝗴 𝗞𝗮𝗺𝗮𝗿𝗮 𝗱𝗲 𝗥𝗲𝗽𝗿𝗲𝘀𝗲𝗻𝘁𝗮𝗻𝘁𝗲𝘀 𝗮𝗻𝗴 𝗶𝗺𝗯𝗲𝘀𝘁𝗶𝗴𝗮𝘀𝘆𝗼𝗻 𝗛𝗼𝘂𝘀𝗲 𝗤𝘂𝗮𝗱 𝗖𝗼𝗺𝗺𝗶𝘁𝘁𝗲𝗲 𝘂𝗽𝗮𝗻𝗴 𝗽𝘂𝗻𝘁𝗶𝗿𝘆𝗮𝗵𝗶𝗻 𝘀𝗶𝗻𝗮 𝗱𝗮𝘁𝗶𝗻𝗴 𝗣𝗵𝗶𝗹𝗶𝗽𝗽𝗶𝗻𝗲 𝗡𝗮𝘁𝗶𝗼𝗻𝗮𝗹 𝗣𝗼𝗹𝗶𝗰𝗲 (𝗣𝗡𝗣) 𝗖𝗵𝗶𝗲𝗳 𝗚𝗲𝗻𝗲𝗿𝗮𝗹 𝗮𝘁 𝗻𝗴𝗮𝘆𝗼’𝘆 𝗦𝗲𝗻𝗮𝘁𝗼𝗿 𝗥𝗼𝗻𝗮𝗹𝗱 “𝗕𝗮𝘁𝗼” 𝗗𝗲𝗹𝗮 𝗥𝗼𝘀𝗮 𝗮𝘁 𝗱𝗮𝘁𝗶𝗻𝗴 𝗣𝗮𝗻𝗴𝘂𝗹𝗼𝗻𝗴 𝗥𝗼𝗱𝗿𝗶𝗴𝗼 𝗥𝗼𝗮 𝗗𝘂𝘁𝗲𝗿𝘁𝗲.

Sinusugan din ni Barbers ang pahayag ng kapwa nito kongresista na si Santa Rosa City Lone Dist. Cong. Dan S. Fernandez, chairman ng House Committee on Public Order and Safety, na hindi sila sumusunod sa kumpas o kaya ay dikta ng House leadership na tumutukoy kay House Speaker Ferdinand Martin Gomez Romualdez.

Ayon kay Barbers, hindi “hao-siao” o “moro-moro” ang kasalukuyang pagsisiyasat ng Quad Committee na tumatalakay sa mga mahahalaga at kontrobersiyal na usapin gaya ng Extra-Judicial Killings (EJK), madugong war-on-drugs at illegal operation ng Philippine Offshore Gaming Operators (POGO) na pawang mga nakakulapol o nakakabit kina Dela Rosa at Duterte.

Pagdidiin pa ni Barbers na ang pagkakadawit ng pangalan nina Senator Dela Rosa at dating Pangulong Duterte sa mga naturang kontrobersiya ay batay mismo sa testimonya ng mga pangunahing testigo na nagbigay ng kanilang salaysay patungkol sa mga kasong may kinalaman sa illegal drug sale, EJK, war-on-drugs at POGO kung saan nakakaladkad o nababanggit ang pangalan ng mag-amo.

Iginiit ng kongresista na sa halip na magbigay ng walang katuturan o walang basehang akusasyon sina Dela Rosa at Duterte, mas makabubuti umanong humarap na lamang sila sa imbestigasyon ng Quad Committee upang ibigay ang kanilang panig patungkol sa mga kontrobersiyang inilalabatibak sa kanila ng mga testigo partikukar na sa usapin ng illegal drugs at war-on-drugs campaign.

Paliwanag ni Barbers na ang pagsisiyasat ng House Quad Committee ang tamang venue para sagutin nina Dela Rosa at Duterte ang mga mabibigat akusasyon laban sa kanila lalo na sa kaso ng pagpatay sa tatlong hinihinalang Chinese nationals na sangkot sa illegal drugs at ang “oplan tokhang” kung saan sinasabing libo-libong inosenteng sibilyan aniya ang walang awang pinaslang.

Muling binigyang diin pa ni Barbers na hindi si Speaker Romualdez ang bumuo ng Quad Committee kasunod ng pahayag nito na mismong siya ay hindi papayag na gamitin o kaya naman ay diktahan para lamang sa pagsusulong ng pansariling interes gaya aniya ng nais palabasin nina Dela Rosa at Duterte.

𝗧𝗼 𝗚𝗼𝗱 𝗯𝗲 𝘁𝗵𝗲 𝗚𝗹𝗼𝗿𝘆