Calendar
Nasa larawan ang naarestong driver ng Mitsubishi Lancer matapos umiwas sa checkpoint sa Brgy. Tabuating, San Leonardo, Nueva Ecija at nahulihan ng kalibre 38 na baril at shabu. Kuha ni STEVE A. GOSUICO
Baril na walang lisensiya, droga nakuha sa umiwas sa checkpoint
SAN LEONARDO, Nueva Ecija–Naghihimas ngayon ng malamig na rehas ang lalaking nahulihan ng baril na walang lisensya at shabu sa police checkpoint noong Sabado.
Kinilala ni Nueva Ecija police chief Col. Ferdinand Germino ang suspek na 43-anyos na technician mula sa Brgy. Sanbermecristi, Cabanatuan City.
Nabuking ang boga ng suspek ng umiwas sa checkpoint habang sakay ng maroon Mitsubishi Lancer (CNY-205) sa Brgy. Tabuating dakong alas-2:40 ng hapon.
Nakuha sa kanya ng mga awtoridad ang isang cal.38 revolver, anim na bala at 0.58 na gramo ng shabu na nagkakahalaga ng P3,944.
Inihahanda na ang mga kasong paglabag sa Republic Act 10591, Republic Act 9165 at Disobedience to an Agent of Person in Authority para sa inquest-filing laban sa suspek sa provincial prosecutor’s office sa Cabanatuan City.
