NAGBABALA ang Bureau of Immigration (BI) sa publiko na huwag makipagtransaksyon sa mga fixer at hindi awtorisadong ahente kasunod ng pagkakaaresto sa dalawang indibidwal na nagpanggap na empleyado ng ahensya.

Inaresto ng mga operatiba ng Criminal Investigation and Detection Unit ng Quezon City Police District (QCPD) ang mga suspek sa entrapment sa Camp Karingal noong Biyernes. Inakusahan ang dalawa ng pangingikil sa isang 43-anyos na Koreano kapalit ng renewal ng kanyang working visa at Alien Certificate of Registration (ACR).

Kinumpirma ni BI Commissioner Joel Anthony Viado na hindi empleyado ng BI ang dalawa.

“Pinupuri namin ang mabilis na aksyon ng QCPD sa pag-aresto sa mga indibidwal na ito na maling nagpanggap bilang kawani ng BI,” sabi ni Viado.

Binigyang-diin ni Viado na ang lahat ng lehitimong serbisyo ng BI ay maaaring makuha nang ligtas sa pamamagitan ng online e-services portal ng ahensya sa e-services.immigration.gov.ph o sa mahigit 60 tanggapan ng BI sa buong bansa.

“Patuloy na isinusulong ng Bureau ang transparency at integridad sa pagbibigay ng serbisyo publiko,” dagdag pa niya. “Hinihikayat namin ang publiko na iulat ang sinumang nagpapanggap bilang empleyado ng BI o sangkot sa ilegal na gawain sa ngalan ng ahensya.”

Hinimok din ng BI ang iba pang posibleng biktima na lumantad at magsampa ng ulat sa pulisya.