IPINABATID ni House Speaker Ferdinand Martin Gomez Romualdez na nagparamdam na sa kaniya ang kontrobersiyal na mambabatas na si Negros Oriental 3rd Dist. Congressman Arnolfo “Arnie” Teves, Jr. matapos itong tumawag sa kaniya mula sa hindi matukoy na lugar o bansa.

Sinabi ni Speaker Romualdez na base sa naging pag-uusap nila ni Teves noong Lunes ng gabi (March 13), nangangamba aniya ang kongresista para sa kaniyang seguridad at maging sa miyembro ng kaniyang pamilya kaya hanggang ngayon ay nag-aalangan pa itong bumalik ng Pilipinas.

Gayunman, tiniyak ni Romualdez na bilang lider ng Kamara de Representantes ay gagawin nito ang lahat ng paraan upang masiguro ang kaligtasan ng lahat ng miyembro ng Mababang Kapulungan.

Inatasan din ng House Speaker ang House Sergeant-at-arms Napoleon Taas na makipag-ugnayan sa mga law enforcement agencies para maihanda ang kinakailangang “security arrangements” sakaling tuluyan ng bumalik ng Pilipinas si Teves mula sa Estados Unidos (US).

Iginiit din ni Romualdez na kailangan nang bumalik ng Pilipinas si Teves para mag-report sa Kongreso kasunod ng pagbibigay nito ng kaniyang pahayag kaugnay sa pagkakasangkot ng kaniyang pangalan o itinuturong utak sa kaso ng pagpatay kay Negros Oriental Governor Roel Degamo.