KAMPO BGEN VICENTE LIM, Calamba City — Umaabot sa P442,000 na halaga ng ilegal na droga at isang baril ang nasamsam ng Drug Enforcement Team ng Tanauan police sa isang nahuling drug suspek noong Biyernes sa Tanauan City, Batangas.

Nahuli ang suspek si alyas Raymundo, 44, matapos magbenta ng shabu sa isang pulis na poseur-buyer, ayon sa report.

Nagresulta ang pagkakatiklo sa suspek sa pagkakakumpiska ng 65 na gramo ng shabu at may standard price na P442,000, isang .38 caliber pistol, pitong bala, digital weighing scale, P3,500 sa iba’t-ibang denominasyon, isang Toyota Corolla (TLB 366) at boodle money.

Ang nahuling suspek at mga nakumpiskang ebidensya ay inilipat sa Regional Forensic Unit 4A para sa karagdagang imbestigasyon at ballistic examination.

Pinuri ni PNP Calabarzon chief P/Brig. Gen. Paul Kenneth Lucas ang mga pulis sa pagkakahuli sa suspek.